Ravshan Ermatov: "Ilmiy-tahliliy yondashuv orqali o'smir futbolchilarning rivojlanishini o'rganib borish, tahlil qilish kerak"

O'FA rahbariyati terma jamoalar murabbiylari tomonidan amalga oshirilgan ishlar hisoboti, o'quv-mashg'ulot yig'inlari natijalari hamda keyingi musobaqalarga tayyorgarlik rejalari bilan tanishdi.

Tanqidiy ruhda o'tgan yig'ilish davomida har bir yosh toifasidagi murabbiylarga tayyorgarlik jarayonida zamonaviy texnologiyalardan faol foydalanish, murabbiylar shtabida esa doimiy ravishda tahlilchilar, selecionerlar va jismoniy tayyorgarlik bo'yicha yuqori malakali mutaxassislar faoliyat yuritishi lozimligi takidlandi. Buning uchun murabbiylar talimi yo'nalishini yanada yaxshilash yuzasidan topshiriq berildi. 

"O'smirlar terma jamoalarimiz har yili Osiyo Kubogi va Jahon chempionati yo'llanmalari uchun kurash olib boradi. Ushbu musobaqalarda yuqori saviyada ishtirok etish, avvalgi natijalarni takrorlash va yaxshilash uchun jismoniy tayyorgarlik, ilmiy-tahlil, hamda taktik yo'nalishlarda kuchli murabbiylar zarurligi. Ayniqsa, bu yoshda ilmiy-tahliliy yondashuv orqali orqali futbolchilarning rivojlanishini o'rganib borish, tahlil qilish kerak", – dedi Ravshan Ermatov.

Shuningdek, U-15, U-16, U-18 va U-23 terma jamoalari bosh murabbiylari tomonidan o'tkazilgan yig'inlar tahlil qilindi. Selekciya jarayonini yanada kuchaytirish, futbolchilarni jismoniy hamda texnik-taktik jihatdan puxta tayyorlab borish bo'yicha topshiriqlar berildi.

Ayollar futbolini rivojlantirishning 2025–2029 yillarga mo'ljallangan strategiyasi muhokama qilindi. Kichik yoshdagi qizlar terma jamoalari uchun futbolchi etkazib berish maqsadida qizlar o'rtasida turnirlarni ko'paytirish, xalqaro o'yinlar va festivallar tashkil etish orqali selekciya jarayonini kuchaytirish vazifasi belgilandi.