Ravshan Ermatov: "Ektor Baldassi FIFAning emas, o'z fikrini bildirgan edi"

Ushbu dasturda "El yurt hurmati" ordeni sohibi bo'lgan hakamimiz o'z fikrlarini bildirdi.

"Braziliyadagi o'tgan Jahon chempionatida olam-olam taassurot oldim. Braziliya futbol bilan yashadi. Ertalabdan kechgacha u erda faqat futbol bosh mavzuga aylandi.

U erda kutilmagan natijalar bo'ldi. Aslida men oldindan hech qachon taxmin qilmayman. Lekin Kosta-Rika ko'rsatgan o'yin barchani lol qoldirdi. O'zi kichkinagina davlatning natijalari kutilmagan bo'ldi. Urugvayni mag'lub etishdi, Italiyani taslim qilishdi. Guruhdan chiqishdi... Bir voqeani aytib beraman. Aslida har bir o'yindan so'ng ikkala jamoaning bittadan futbolchisi doping tekshiruvidan o'tishi kerak. Kosta Rikaning dastlabki o'yinida 1ta, ikkinchi o'yinida 3ta, keyinroq xatto 7ta futbolchisini doping tekshiruvga olib qolishdi.

Meni Argentina terma jamoasi ishtirokidagi o'yinga tayinlanmaganim haqida. Sobiq hakam Ektor Baldassi o'z shaxsiy sahifasida bu borada o'z fikrlarini yozgan ekan. Buni men bilib FIFA vakiliga murojaat qildim. U ushbu xabarni mendan eshitayotganini aytib o'tdi. O'zbekistondagi jurnalistlar o'sha malumotni rasmiy xabar sifatida talqin qilishdi.

Braziliyadagi mundialda hakamlarga yordam tariqasida golni aniqlash texnologiyasi sinovdan o'tkazildi. Bu o'z samarasini bergani aniq. CHunki odam ko'zi ilg'ay olmagan vaziyatni texnologiya aniqlay oladi.

Nishimura ham odam, u ham xato qiladi. O'zbekiston va Eron o'rtasidagi o'yinda bizning golimizni hisobga olmay xato qilganini tan oldi. Buni xato deb ham ayta olmayman, ko'ra olmay qolgan vaziyati natijaga tasir qilmasligini istardim. Bunday holat futbolda ko'p bo'ladi, Nishimura buni atayin qilmagani aniq. Jahon chempionatida golni aniqlash texnologiyasi ishlatildi, menimcha barcha muhim o'yinlarda ushbu texnologiyani qo'llash vaqti keldi. Men aynan shuning tarafdoriman, - deydi Ravshan Ermatov.