Rade Petrovich: "O'yinni 60 daqiqa nazorat qilib g'alaba qozondik"

- O'yin haqida fikringiz?

- Safarda chiroyli o'yin ko'rsatib g'alaba qozondik. O'yinni 60 daqiqa nazorat qildik deb o'ylayman. "Sho'rtan" darvozaboni o'z darvozasini yaxshi qo'riqladi. Bizda ham imkoniyatlar bo'ldi. Raqibda ham ko'p imkoniyatlar yuzaga keldi. Bahs qiyin kechishini bilardik. G'uzor jamoasi Jizzaxda bizga ancha qarshilik ko'rsatib durang qayd etgandi. Umuman olganda "Sho'rtan" yaxshi jamoa.

- Bugun jamoa bosh murabbiyi Ivan Boshkovichni maydonda ko'rmadik.

- Bosh murabbiyimizda sariq kartochkalar to'rtta bo'lgandi, shu bois qaydnomaga kiritilmadi va zaxira o'rindig'ida o'tirmadi. Bunday holat o'tgan yil ham sodir bo'lgandi. Biz birgalikda uch yildan beri ishlayapmiz, Boshkovichni yaqindan bilaman. Uning ehtiroslarga berilishini tushunaman, chunki doim g'alaba qozonishni xohlaydi. Keyin o'yinda bosh murabbiy jamoa bilan birga bo'ladi.

- Ikkinchi taymda "Sho'rtan" ancha yaxshi harakat qildi. 

- Men ham shu fikrdaman. Aytdim-ku, biz 60 daqiqacha o'yinni nazorat qildik. Keyin ustunlik mezbonlar tomonga o'tdi. Bu jamoaning oxirgi o'rinda borayotgani meni hayron qoldiradi, chunki "Sho'rtan" yaxshi o'yin ko'rsatmoqda.

- G'uzorliklarda bosh murabbiy o'zgargani jamoa o'yinida bilindimi?

- Bilasizmi, birinchi davrada biz bilan o'yingacha ham "Sho'rtan"da murabbiy o'zgargandi. Yangi murabbiy o'zini ko'rsatadi degan umiddaman.