"Quruvchi" (keyinchalik "Bunyodkor") loyihasiga sarflangan millionlar o'zini oqladimi?

Abror aka "Bunyodkor" loyihasiga tikilgan millionlarning o'zini oqlab, oqlamagani to'g'risidagi savolga shunday javob qaytardi:

"Yo'q, mablag' jihatidan oqlamagan bo'lishi mumkin. Lekin, futbolning rivoji uchun katta hissa qo'shdi. Sababi shundaki, o'zbek futbolida 2002 yildan keyin "Paxtakor"ning monopoliyasi vujudga kelgan, "sherlar"ga hech kim yaqinlasha olmas edi. "Quruvchi" (keyinchalik "Bunyodkor") klubi esa bu holatga chek qo'yib, ichki chempionatda juda kuchli raqobat paydo qildi.

Ikkinchidan, professional klub ish tizimini yo'lga qo'yib, boshqalarga o'rnak bo'ldi. Klub qanday bo'lishi kerak, qanaqa bo'limlar ishlashi kerak qabilidagi savollarga javob topib berdi. Marketing, menejment va matbuot xizmatlarining qay tariqa ishlashi kerakligini boshqalarga ko'rsatib qo'ydi.

Va eng muhimi, xorijdan katta nomlarning olib kelinishi o'z futboli uchun o'ziga xos "bum" bo'ldi. Rivaldo, Ziko va Skolari singari afsonalarni muxlislar o'z ko'zlari bilan ko'rishdi. Bu tomonlama ijobiy hislatlar ko'p. Ammo, yuqorida aytganimdek, mablag' jihatidan o'zini hech qachon oqlamagan".

Malumot uchun, A. Imomxo'jaev "qaldirg'ochlar" tizimida 2007-2020 yillarda (malum tanaffuslar bilan) faoliyat yuritib, matbuot kotibligidan bosh direktor o'rinbosari lavozimigacha ko'tarilishni uddalagan.