Qozog'iston Prezidenti Toqaev: "Futbol klublarini xususiylashtirish bo'yicha ishlarni tezlashtirish kerak. Busiz futbol rivojlanmaydi"

"Futbol klublarini xususiylashtirish bo'yicha ishlarni tezlashtirish kerak. Bugungi kunda 4 ta Qozog'iston futbol klubi taniqli tadbirkorlar tomonidan boshqarilmoqda. Bu uchun ularga minnatdorchilik bildiraman.

Lekin futbolni tijoratlashtirishni davom ettirish kerak. Jahon amaliyoti ko'rsatadiki, busiz Qozog'istonda futbol rivojlanmaydi.

Professional sportni biznes sanoati sifatida ham ko'rish kerak, bu soha yaxshi daromad keltiradi", – dedi Qozog'iston Prezidenti Qasim-Jomart Toqaev.

2024 yil mart oyida prezident qozog'istonlik tadbirkorlarni "klub futboliga biznes sifatida qarashga" chaqirgan edi.

«Klublar faqat viloyat byudjetlariga tayanib yashamasligi kerak, dunyoda bo'lgani kabi o'zlari daromad topishni o'rganishlari lozim.

Shuning uchun tadbirkorlarni klub futboliga biznes sifatida qarashga chaqiraman. Jahon tajribasi shuni ko'rsatadiki, xususiylashtirishsiz bu ish yurishmaydi.

Agar klublar xususiy bo'lsa, ular chet el sportchilarini taklif qilish huquqiga ega bo'ladi", – degan edi Toqaev.

Joriy yilning mart oyida Qozog'istonda 461 ta subekt raqobatbardosh muhitga o'tkazish uchun tanlab olindi, bu ro'yxatdagilarning ettitasi futbol klubi.