Qosimov: Ahmedovning tez orada safga qaytishiga umid qilamiz

Interfutbol gazetasiga bergan intervyusi chog'ida milliy terma jamoa bosh murabbiyi Odil Ahmedov bilan qo'ng'iroq orqali suhbatlashganini va uning tez orada safga qaytishi mumkinligini aytib o'tgan: Ahmedov bilan o'shi kunning o'zidayoq telefon orqali bog'landik. Uning kayfiyati yomon emas edi. O'yinning ertasi kuni tibbiy tekshiruvdan o'tdi va rentgen natijalariga ko'ra uning mushaklarida zo'riqish borligi aniqlangan. Bu unchalik jiddiy jarohat emas va uning tiklanishi uchun deyarli ikki hafta vaqt kifoya qilishi mumkin. SHunda bo'lsa ham u chuqurlashtirilgan tibbiy ko'rikdan o'tishi lozim va shundan keyingina uning jaroxatiga aniq tashhis qo'yilishi mumkin. Odilning o'zi jaroxat olgan paytida oyog'ida qattiq og'riq his qilganini aytgan, bu esa jaroxatning biroz jiddiyligini bildiradi. Umid qilamizki, qayta tekshiruvdan o'tgach bu jaroxat unchalik jiddiy bo'lib chiqmaydi, - deydi Qosimov.

Milliy terma jamoa bosh murabbiyi shuningdek, futbolchining mehnatkashligini va bu unga jaroxatini tezroq engib o'tishi uchun yordam berishi mumkinligini qo'shimcha qildi: Har qanday holatda ham, bundan jaroxatlarni davolash uchun kamida uch hafta vaqt ketadi. Albatta, biz yaxshi niyat qilamiz. Odil - juda mehnatkash futbolchi va juda irodali yigit. Jaroxatidan tuzalishda bu juda katta ahamiyatga ega. Asosiysi, ishlashdan va mehnat qilishdan to'xtamaslik kerak.

Odil Ahmedovning Osiyo Kubogi-2015 bahslariga boradigan tarkibga kiritilishi borasidagi savollarga esa Qosimov quyidagicha javob berdi: Albatta, bunga juda umid qilamiz. O'ylaymanki, bu borada hech qanday muammo bo'lmaydi.