Qo'qondan maqola

47 daraja

Bir kun avval "Qo'qon Markaziy" stadionida ikki jamoaning  o'rinbosarlari bahs olib bordilar. Uchrashuv soat 18:00da  boshlandi. Aynan shu vaqtda havo harorati 47 daraja issiqni  ko'rsatayotgan edi. Bunday havoda futbol o'ynash u yoqda tursin, ko'chada  yurishni o'zi bo'lmaydi. Futboldagi aksar yurak bilan bog'liq muammo  mana shunday issiq tufayli kelib chiqishini unutmasligimiz lozim. 

Issiq ko'proq "Qo'qon-1912" futbolchilariga tasir ko'rsatdi.  O'yindan avval qo'qonlik tanishlarga, "Paxtakor"ning 26 raqamdagi  (Alisher Mirzaev) futbolchisiga etibor qaratishlarini so'radim.  Ikkinchi davra uchun juda yaxshi futbolchi bo'lishi mumkin. Gapim  isboti o'laroq, birinchi golga aynan u pas berdi. Tayanch va markaziy  yarim himoyada juda yaxshi harakat qila oladigan, 1996 yilda tug'ilgan,  yoshi rostan ham kichraytirilmagan futbolchi. Afsuski jarohat  tufayli JCHga bora olmagan edi.

Muzeymi bu yoki "sklad"?

Asosiy tarkib jamoalari o'rtasidagi o'yin ham soat 18:00ga  belgilangan edi. Buni qarangki, o'yin vaqtida havo kechagiga nisbatan  ancha salqin (39 daraja) va shamolga boy bo'ldi. Uchrashuvga qadar  vaqt ko'p edi, qo'qonlik akamiz, futbol ishqibozi Akramjon aka men  va Abdurahmon Fozilovni Qo'qon xonligining so'nggi xoni, Xudoyorxon  saroyiga (muzey) taklif qildilar. Tarixni yoshligimdan yaxshi ko'rmayman-mi, jon deb rozi bo'ldim. 

"Gid" yordamida saroyni aylanishga kirishdik. Sayohat boshlnishi  lozim bo'lgan xonalar, shu kuni muzey hududida klip olayotgan  xonandaning ishchi guruhi tomonidan band qilingan ekan, qaytishda  kirishga kelishdik. Muzeyni aylanar ekanmiz, juda ham qimmatbaxo  yodgorliklarni ko'rdik. Ular ichida yapon imperatorining sovg'asidan  tortib, 1800-1920 yillarga tegishli bo'lgan qo'l yozmalar-u, turli  asbob uskunalarni ko'rishingiz mumkin. Lekin juda ko'p narsalar  qo'lga yaqin, xavfsizlik nuqtai nazaridan qo'riqlash xizmati juda  zaifdek. Eng qizig'i, bir soatdan ortiq muzeyni aylanib chiqar  ekanmiz, hamon biz kirishimiz lozim bo'lgan xona ochilmagani bo'ldi.  Ochishlarini so'rasak, "kalitni klipchilarga berdik", degan javobni  oldik. Qanday qilib davlat muxofazasida bo'lgan muzeyning asosiy  xonasini, etti yot begona bo'lgan "klipchilar"ga berish mumkin?  Klipchilar esa u erda texnika vositalari turganligini aytib  kiritishni istamadilar, ammo biz kirishimiz lozimligini aytdik va  kirdik. 

CHiptalarning bozori chaqqon

"Qo'qon-1912" so'nggi o'yinlarda g'alaba qozona olmayotganligi uchun  muxlislarni stadionga kirishi biroz kamaygan ekan. Ammo raqib  "Paxtakor" edi. Stadion yana to'ldi, bironta chipta qolmadi. Bir kun  avval o'rinbosarlar uchrashuviga ikki mingdan ortiq muxlis kirgan  edi. Ko'pchilik muxlislar biz bilan uchrashar ekan, chiptalar narxi  qimmatligidan nolidilar. Bugunda chiptalarning narxi joyiga qarab  10 000 va 5 000 so'm. Lekin muxlislar to'g'ri tushunishlari kerak,  futbol bu biznes va undan hamma ham daromad olgisi keladi. Lekin  ularning bir gapida jon bor, "servis" yo'q. SHuncha pulga chipta  olsakda, stadionda bizga sharoit yo'q deganlar ko'p bo'ldi. Qo'qondagi  stadion ixchamgina, 8 ming kishini o'z bag'riga sig'dira oladi.  Haqiqatdan ham, muxlis uchun sharoitni yaxshilab qo'yish kerak.  Asosiy muammo hamma erda bo'lgani kabi suv va xojatxona masalasi  bo'layotgan ekan. Ko'pchilik o'yinga o'z velosipedida keladi, ularni  qo'riqlash uchun ham maxsus joy bo'lsa yomon bo'lmasdi deganlar ko'p  bo'ldi. Xullas o'yinni boshlaymiz.

Durang...

"Paxtakor" o'yinni boshlanishidan kelib chiqib qiyinchiliksiz g'alaba  qozonamiz deb o'yladi. Uchrashuvning 5-daqiqasida Igor Sergeev  hisobni ochdi. Bu vaziyat qanot hakami tomonidan o'yindan tashqari  holat deb baholandi. Unga qadar Tantashev o'z hamkasbini eshitmadi.  Gol bo'lganidan keyingiga uni ko'rdi, Sergeevga pas berilishidan  avval "Paxtakor" futbolchisiga nisbatan qo'pollik ishlatilganligi  sabab, gol bekor qilinib, ofsayddan avvalgi daqiqaga qaytildi va  jarima zarbasi. Bu erda qanot hakam to'g'ri qaror qilgan ekan. 

Ko'p o'tmay "Paxtakor" gol urdi, Nosir Otaqo'ziev esa uzoqqa bormay  javob berdi. Kuchli shamol ikki jamoaga qiyinchilik tug'dirdi. 

Tanaffus paytida stadiondagi "CA" o'quvchilari uchun fotosessiya  uyushtirdik. 

Akramjon Mamadaliev uchun kutilmagan sovg'a

Bir kun avval Abdurahmon Fozilov bilan tanaffus paytida, so'nggi  yillarda "Qo'qon-1912" jamoasiga yaqindan yordam berib kelayotgan Akramjon Mamadalievni tabriklashga kelishib olgan edik. Osiyo  chempionlar ligasining original to'pini, tanaffus chog'ida u kishiga topshirdik. Tabiiyki 8 ming nafar muxlis qarshisida kutilmagan  sovg'ani qo'lga kiritishning tami bo'lakcha bo'ladi. 

Hakam Rustam Tolibjonov bilan qisqa suhbat

Ikkinchi bo'lim arafasida to'p olib beruvchi bolalarni suratga olib qo'yishimni so'rab, murabbiyi murojaat qildi. Suratga olib, o'z joyimga o'tirganimdan so'ng birinchi liga va o'ribonsarlar chempionatida hakamlik qilib kelayogan qo'qonlik, Rustam Tolibjonov bilan suhbatlashib qoldim. U mahalliy sport maktabida rahbar ekan, o'z ishlari haqida so'zlab berdi, barcha viloyatlarga borib ishlarni o'rganishimiz kerakligi haqidagi xabarimizni o'qiganligini aytib, bu narsa kerakligini takidladi. 

Hakam nima uchun IKKI oldi?

Ikkinchi bo'lim ham birinchi bo'lim kabi boshlandi. "Paxtakor" tajriba, "Qo'qon-1912" esa kuchli ishtiyoq evaziga o'ynadi. SHu bois bo'lsa kerak, o'yin bir xil kechdi. Stanislav Andreev o'z repertuarida hisob 1:1 bo'lib turgan payt Ruslan Matniyozov bilan birga-bir vaziyatni ko'kka sovurdi. Huddi shunday hisob paytida Aziz To'xtaboev ham qulay imkoniyatni boy bergan edi. Ikki bo'limda ham hakamlarning xatolari ko'rinib turdi. Ayniqsa Ilgiz Tantashev va qanot hakami Bahodir Qodirovni. Qodirov aut kimdan chiqayotganini bazi vaziyatlarda noto'g'ri baholadi. Bir safar Maxaradzening zarbasidani so'ng to'p maydonni tark etdi, bu vaziyatda Tantashev kutilmaganda burchak zarbasini ko'rsatdi. Penalti esa to'g'ri belgilandi. Qo'shimcha vaqt biroz ko'payib ketdi, uzog'i 5 daqiqa etar edi. Haqiqatdan ham to'xtalishlar bo'ldi. Hisobni tenglashtiruvchi gol esa 93-daqiqaga to'g'ri keldi. 

Uchrashuv boshlanishi oldigi, kichik epizodni eslab o'tsam. "Qo'qon-1912" suxandoni, Akramjon aka va yana ikki kishi gurung qlib turgan payt, hakamlar brigadasi chiqib kelayotgan edi. Kattalar kichiklarga, salom berib, "xormang"lar deb qo'yishdi. To'rtta hakamdan birontasi boshini burib qarab ham qo'ymadi, 2 metr yurgach uchrashuv nazoratchisi va ayrim mansabdorlar bilan qo'llarini ko'ksilariga qo'yib quyuq-suyuq ko'rishib ketishdi. CHetdan kuzatgan kishiga juda ham hunuk ko'rinar ekan, juda... Yakunda aynan o'sha nazoratchi tomonidan qo'yilgan IKKI bahoga hech kim hafa bo'lmadi.

Aslida uni ustidan "Paxtakor" ariza berdi, agar "Qo'qon-1912" ham o'zi uchun noto'g'ri deb bilgan qarorlari uchun ariza bera olganida edi, lekin ular bunday qilisha olmaydi, keyingi o'yindan qo'rqishadi. Natijada, kim yomon, sayt. Aslida saytdagi chiqqan xabar deyarli kuchga ega emas, avvalo klublar rahbarlari o'zlarini himoya qila olishlari kerak, shuning uchun ular rahbarlar.

Bugun O'FF tomonda uchrashuv nazoratchisi, Aleksandr Popovni ko'rib qoldim. Golda haqiqatdan ham ofsayd borligini va qanot hakami bu holatni to'g'ri baholaganini aytdi. Unda nima uchun iki baho oldi degan savolim ochiq qoldi, boisi ular PFL reglamentiga ko'ra ular bu haqda aytmasliklari lozim ekan.

Hozircha menda shular, o'ylaymanki joriy mavsum "Qo'qon-1912" oliy ligada o'z o'rnini saqlab qola oladi va keyingi yil muxlislarini bu yilgidek havotirga solmaydi.

Nodirxo'ja Yuldashev