"Qizilqum": Navoiyda havas qilsa arzigulik maydon

Oxirgi o'n yil ichida nafaqat poytaxtimizda, balki yurtimizning turli viloyat va shaharlarida bir-biridan ko'rkam stadionlar qad rostladi. Bunga har qancha havas qilsa arziydi.

Ammo barpo etilayotgan stadionlarning barchasida yashil maydonning holati maqtagulik emas. Bu borada poytaxtimizdagi “Lokomotiv”, Toshkent temiryo'l muhandislari instituti, “Paxtakor” kabi barmoq bilan sanoqli stadionlar futbol maydoni murabbiylar va futbolchilar etirofiga sazovor, albatta.

Xabaringiz bor, “Qizilqum” jamoasi uy uchrashuvlarini 2014 yilning 2 mayidan boshlab Navoiyda barpo etilgan “Yoshlar” sport majmuasida o'tkazib kelayotgan edi. Ammo oxirgi paytlarda ushbu sport inshooti futbol maydonining holati mutaxassislar etiroziga sabab bo'layotgandi.

Albatta, zamonaviy muhtasham stadionda maydon ham shunga munosib bo'lishi lozim. O'z oldiga kelajakda raqobatbardosh, kuchli jamoani shakllantirishni bosh maqsad qilib qo'ygan Navoiy viloyat hokimligi, viloyat futbol federaciyasi bu borada etiborli ishga qo'l urdi.

Amaldagi mavsumning birinchi davra uchrashuvlari yakunlangach, shaxsan viloyat hokimligi hamda viloyat futbol federaciyasi tashabbusi bilan “Yoshlar” sport majmuasi futbol maydoni chimini almashtirishga kirishilgandi.

Mahalliy xomiylar ko'magida uch oyda davomida keng ko'lamli bunyodkorlik va ko'kalamzorlashtirish ishlari amalga oshirildi. Bu ishni amalga oshirish koreyalik mutaxassislar zimmasiga yuklatildi. Poytaxtimizda “Lokomotiv” hamda TTYMI stadionlari uchun yashil maydon barpo etib bergan IP OOO “RITA IVESTMENT” korxonasi mutaxassislari futbol maydoni chimini to'liq qayta barpo etish ishlarini boshlab yubordi.

Bugun “Yoshlar” sort majmuasida ishlar nihoyasiga etay deb qoldi. Stadionga kelga kishining amalga oshirilgan keng ko'lamli yumushlarni ko'rib bahri dili ochilishi shubhasiz.

- Reja bo'yicha stadion futbol maydoni sentyabr oyining oxirgi o'n kunligida tayyor bo'lishi lozim edi, - deydi IP OOO “RITA IVESTMENT” korxonasi vakili Igor Li. - Buning uddasidan chiqdik. Yashil maysalar deyarli futbol o'ynash uchun tayyor holatga keltirildi. Ammo kelajakni o'ylagan “Qizilqum” PFK rahbariyati bu maydonda yangi mavsumdan boshlab uchrashuvlarni o'tkazishni maqul topdi. SHu bois, shoshmasdan maydonni obdon bahslarga hozirlayapmiz.