"Qizilqum": Mag'lubiyat saboq bo'lishi shart

Bu mag'lubiyat navoiylik muxlislarni juda ranjitdi. Bugun, aniqrog'i, 3 avgust ertalab Navoiyda "Qizilqum" PFK Tasischilar kengashining navbatdan tashqari yig'ilishi bo'lib o'tdi. Unda "Qizilqum" jamoasi bosh menejeri ham ishtirok etdi.

Yig'ilishda navoiyliklarning mazkur kutilmagan yirik hisobdagi mag'lubiyati xususida so'z bordi. "Konchilar"ning milliy chempionatda munosib ishtirok etishi uchun Navoiy viloyati futbol federaciyasi, viloyat hokimligi va xomiylar tomonidan zarur barcha shart-sharoitlar yaratib berilayotganligiga qaramay, jamoaning ikkinchi davra uchrashuvlarini muvaffaqiyatsiz boshlaganligi jiddiy tanqid qilindi.

Yig'ilish qaroriga ko'ra, klub bosh menejeri ogohlantirildi. Jizzaxda qayd etilgan yirik mag'lubiyatdan tegishli xulosalar va saboq chiqarilishi zarurligi alohida takidlandi. Uchrashuvda o'z ishiga sovuqqonlik bilan yondoshganligi tufayli murabbiylar shtabi hamda salbiy natijani qayd qilganligi bois jamoa azolari moddiy jarimaga tortildi. Bu jarima miqdori bir oylik ish haqi miqdorida etib belgilandi. Agar yana shu kabi salbiy natijalar takrorlanadigan bo'lsa, bundan-da jiddiy choralar ko'rilishi takidlab o'tildi.

Eslatib o'tamiz, "Qizilqum" - "So'g'diyona" jamoalarining dastlabki davraning birinchi turida Navoiyda kechgan bahsida konchilar yirik - 4:1 hisobida zafar quchishgandi.

Navbatdagi turda "Qizilqum" futbolchilari Toshkentda "Bunyodkor" jamoasi mehmoni bo'ladi. Uchrashuv 7avgust kuni soat 19.00 da "Bunyodkor" stadionida bo'lib o'tadi.