"Qizilqum": Yig'inda gruziyalik legionerlar qatnashmoqda

Mashg'ulotlarda birinchi davra uchrashuvlarini yoshlar tarkibida o'tkazgan yarim himoyachi Bobirjon Iskandarov, hujumchi Bahodir Qosimovlar ham qatnashmoqda. Jamoa murabbiylar shtabi ikkinchi davraga munosib tayyorgarlik ko'rish maqsadida yana bir qator legionerlarni ham ko'rikdan o'tkazishni rejalashtirishgan. Jumladan, poytaxtda uyushtirilayotgan mashg'ulotlarga gruziyalik Georgiy Kvesishivili, Georgiy Mikaberidze jalb etilgan. Himoyachi Kvesishivili “Buxoro” jamoasidagi o'yinlari bilan muxlislarimizga yaxshi tanish. Yarim himoya va hujum chizig'ida to'p suradigan Mikaberidze esa oxirgi mavsumda Gruziyaning “Olimpi” (Rustavi) jamoasi sharafini himoya qilgan.
   
Konchilar Toshkentda 20 iyulga qadar yig'in o'tkazishni mo'ljallashgan. Bu vaqt mobaynida Yuriy Lukin shogirdlari bir necha o'rtoqlik o'yinlarida maydonga tushadi.
   
“Qizilqum” jamoasi dastlabki sinov uchrashuvini 14 iyulda Namanganning “Navbahor” vakillariga qarshi o'tkazdi. Unda murabbiylar shtabi ikki tarkibni maydonga chiqazdi.
   
Dastlabki bo'limda navoiyliklar maydonda quyidagi tarkibda maydonda harakat qildilar:
   
Artyom Makosin, Akmal Rustamov, Asqarjon Muhiddinov, Georgiy Kvesishivili, Mirjalol Qurbonov, Azizbek Usmonov, Alisher Sanoev, Samandar SHodmonov, SHerali Jo'raev, Ruslan Vagapov, Georgiy Mikaberidze.
   
Ikkinchi bo'limda esa quyidagi futbolchilar “Qizilqum” libosida uchrashuvni davom ettirdilar:
   
Dilshod Hamroev, Akmal Xoliqov, Fayzullo Qambarov, G'ayrat Jumaev, Bobirjon Iskandarov, Eldor Boymatov, Jamshid SHohnazarov, Sarvarjon Xolmatov, Navro'zbek Alimov, Alisher Xoliqov, Nodirbek SHahobiddinov (Bahodir Qosimov).
   
Uchrashuv tafsilotiga qisqacha to'xtaladigan bo'lsak, o'yin teng kurashlar ostida o'tdi. Har ikkala jamoada ham golga tortadigan vaziyatlar etarlicha sodir etilgan bo'lsa-da, undan faqat bir bor namanganliklar unumli foydalandilar. O'yinning 60-daqiqasida konchilar himoyachilarining o'zaro tushunmovchiligidan samarali foydalangan Alisher Mahmudov darvozabon Dilshod Hamroevni osonlikcha dog'da qoldirdi. Uchrashuv oxirigacha shu hisob o'zgarmay qoldi.
   
Rejaga ko'ra, “Qizilqum” jamoasi navbatdagi o'rtoqlik uchrashuvini 17 iyul kuni o'tkazadi. SHu kuni Yuriy Lukin shogirdlari “Bunyodkor” yoshlari bilan kuch sinashadi.