“Qizilqum”: Farg'onadan ochko bilan qaytishimiz shart edi...

O'shanda Zarafshon shahri sharafini himoya qilgan konchilar raqibi bilan 1:1 hisobida durang o'ynashgan.

SHundan beri qancha suvlar oqib o'tdi. Bugun Navoiyda futbolga munosabat tobora professional darajaga ko'tarilib bormoqda. Natijalar tarixda qoladi, deb bejizga aytishmaydi. Hozirgi "Qizilqum", uning maqsadlari bilan avvalgi jamoani o'zaro solishtirish mutlaqo o'rinsiz.

Taqvimga ko'ra, qatorasiga ikki turni safarda o'tkazayotgan navoiyliklarga oson tutib bo'lmasdi. Bir hafta oldin paxtakorchilarga kichik hisobda (1:0) imkoniyatni boy bergan Yuriy Lukin shogirdlari yo'qotilgan ochko o'rnini Farg'onada to'ldirishga urinishlari tabiiy edi. SHu bois, jamoa azolari “Qizilqum” futbol klubi ijrochi direktori Hamidjon Aktamov rahbarligida o'yin kunidan ancha oldin tashrif buyurishdi. Konchilarning o'yinga puxta hozirlik ko'rishlari uchun barcha shart-sharoitlar yaratib berildi. Bu esa o'z samarasini berdi.

Albatta, “Neftchi” jamoasi haqida tarqalgan turfa mish-mish va gap-so'zlar bu futbol klubining kuchsizligini anglatmaydi. Faqat qisqa vaqtda yangidan shakllanayotgan jamoa namoiysh etayotgan o'yinlariga mahalliy muxlislar ko'nika olmayaptilar, xolos. CHunki “Neftchi” farg'onaliklarni o'zining g'alabalariga o'rgatib qo'yganligini ham tan olish lozim. Dastlabki turlardagi omadsizliklar tufayli bosh murabbiy Murod Ismoilovning navoiyliklarga qarshi jiddiy hozirlik ko'rishi avvaldan malum edi. SHu bois, “Neftchi” futbolchilari “Qizilqum”ga qarshi jangovor tarkibda maydonda saf tortdilar.

Uchrashuv tafsilotlariga qisqacha to'xtalib o'tsak, o'yin dastlabki daqiqalardanoq ancha keskin va shiddatli boshlandi. Buni o'yin debyuti ilk besh daqiqasida ikki o'yinchiga bosh hakam tomonidan sariq kartochka ko'rsatilganligi ham ko'rsatib turibdi.

SHu kuni jarohati tufayli maydonga tusha olmagan yarim himoyachi Eldor Boymatovning o'rnini bildirmaslik uchun "Qizilqum" tarkibidagi o'zgarish ijobiy natija berdi. 7-daqiqada Samandar SHodmonov - Ruslan Vagapov “dueti” boshlab bergan hujum Vladimir SHishelov tomonidan samarali yakunlaganida vaziyat mutlaqo boshqacha ko'rinish olardi.

13-daqiqada Jiyamurodovning chamasi 25 metrlardan yo'llagan zarbasidan so'ng to'pni Erkin Jabborov qiyinchilik bilan qaytardi. 22-daqiqada burchakdan uzatib berilgan to'pni Nosir Otaqo'ziev darvozaga yo'lladi, to'p Ro'zimboy Ahmedovga tegib yo'nalishini o'zgartirdi.

32-daqiqada o'ng qanotdan Haydarov - Vagapov xavfli hujum uyushtirishdi. Himoyachilar katta qiyinchilik bilan hujumni bartaraf etishdi. Birinchi bo'limda ikkala jamoa darvoza tomon 3tadan zarba berishdi, ikkala jamoa bir martadan aniq zarba yo'llashdi.

Ikkinchi bo'lim "Qizilqum"ning keskin hujumi bilan boshlandi. O'ng qanotdan Ruslan Vagapovning darvoza tomon yo'llagan kuchli zarbasini G'ayrat Hasanov katta qiyinchilik bilan maydon tashqarisiga chiqarib yubordi.

57-daqiqada Dilyorbek Ermatov Zohid Abdullaevni darvozabon bilan deyarli yakkama-yakka vaziyatga chiqardi. Bu erda chaqqonroq harakat qilgan Erkin Jabborov to'pni egallab oldi. 70-daqiqada Jiyamurodov jarima to'pini amalga oshirdi. Ammo Iqbol Boboxonov 7 metrlar uzoqlikdan darvozani ishg'ol eta olmadi.

71-daqiqada Vladimir SHishelov jamoadoshi SHerali Jo'raevni deyarli yakkama-yakka vaziyatga chiqargandi. Biroq SHerali so'nggi zarbani berishda adashdi va to'p noaniq ketdi. 74-daqiqada Zohid Abdullaev qulay vaziyatda turgan  Nosir Otaqo'zievni to'p bilan taminladi. Ammo Nosir darvozani aniq nishonga ololmadi. 82-daqiqada Jahongir Jiyamurodov amalga oshirgan jarima to'pini Erkin Jabborov mahorat ko'rsatib, egallab oldi. 85-daqiqada Mirjalol Qurbonovga vaqtni o'zgani uchun sariq kartochka ko'rsatildi va maydondan chetatildi.

Mehmonlar maydonda o'n kishi bo'lib qolganliklariga qaramay, so'nggi daqiqagacha hujumkorlikni bir zum ham susaytirmadi. 87-daqiqada hujumchi Alisher Xoliqov bir yo'la ikki himoyachini aldab o'tib, jarima maydonchasi ichiga kirib bordi. Bu vaziyatda himoyachilardan birini uni chalib yiqitdi. Ammo bosh hakam Vladislav Ceytlin hech nima bo'lmaganligiga ishora qilib, o'yinni davom ettirish kerakligini bildirdi. Bungacha esa uchrashuv laynsmenlari ham bir necha bor o'z bayroqlarini ko'tarishda mezbonlar foydasiga “yanglishgan” edilar.

 90+2-daqiqada SHishelovning zarbasi xavfli ko'rinish oldi. To'p darvoza ustuni yonginasidan o'tib ketdi. 90+4-daqiqada Zohid Abdullaev darvozabon bilan to'qnashib ketdi va hakam tomonidan ogohlantirildi.

Har ikki jamoa azolari qanchalik urinishmasin, uchrashuv oxirigacha tabloda hisob 0:0 hisobi saqlanib qoldi.

Muhimi, amaldagi mavsumda o'z oldiga jiddiy maqsadlarni qo'ygan “Qizilqum” Farg'onada mamlakatimizning nomdor jamoalaridan biri “Neftchi”dan ochko tortib oldi. Agar konchilar yaratilgan qulay vaziyatlardan unumli foydalanishganida, ular vodiy safaridan bemalol g'alaba bilan ham qaytishlari hech gap emas edi. SHunga qaramay, ushbu natija 12 aprelda Navoiyda Muborakning “Mashal” jamoasiga qarshi o'tadigan o'yin oldidan futbolchilarimizga ko'tarinki kayfiyat bag'ishlashi tabiiy.


HAKAMLAR HUJJATIDAN KO'CHIRMA:

Oliy liga, 4-tur

5 aprel, shanba

Neftchi (Farg'ona) – Qizilqum (Zarafshon) - 0:0.

Qirguli. “Neftchi” sport majmuasi

Hakamlar: V. Ceytlin (Toshkent), R. Serazetdinov (Toshkent), A. Capenko (Toshkent viloyati), A. Rahimov (Andijon)

Neftchi: G'ayrat Hasanov, Iqbol Boboxonov, Dilyorbek Ermatov, Jahongir Jiyamurodov, Jahonir Mehmonov, Aziz Alijonov (Zohid Abdullaev, 46), Aleksandr Onika (Pavel Smolyachenko, 75), Ruslan Melziddinov, Abdulloh Olimov, Nosir Otaquziev, Ro'zimboy Ahmedov (Maksimilian Fomin, 65).

Qizilqum: Erkin Jabborov, Akmal Xoliqov, Akmal Rustamov (G'ayrat Jumaev, 52), Vladimir SHishelov, Samandar SHodmonov (Alisher Xoliqov, 76), Ruslan Vagapov, Mirjalol Qurbonov, SHerali Jo'raev, Asqar Muhiddinov, Aziz Usmonov, Farruh Haydarov (Fayzulla Qambarov, 69).

Ogohlantirishlar: Aziz Alijonov 2, Vladimir SHishelov 5, Erkin Jabborov 14, Mirjalol Qurbonov 32, Aleksandr Onika 53, Ruslan Vagapov 65, Maksimilian Fomin 68, Alisher Xoliqov 89,  Zohid Abdullaev 90+4.

CHetlatish: Mirjalol Qurbonov (ikkinchi sariq kartochka, 85).

Nazoratchi: G'. Karimov (Toshkent).