Pro-liga peshqadamlari bahsida rekord ko'ramizmi?

O'z tarixida 5 bora mamlakat chempionligini tantana qilgan jamoa so'ngi yillarda Pro-ligada qolib ketayotgani albatta achinarli. 2019 yilgi mavsumda emasku, lekin o'tgan 2020 yili jamoa o'z nomiga munosib bo'lishi uchun ishtiyoq bilan harakat qildi. Bir qator manbalarda "Yil o'yini" deya tarif berilgan o'sha "Turon" bilan kechgan shiddatli bahsning darajasi shu qadar ortib ketdi-ki, eshitmagan muxlis, o'z munosabatini bildirmagan mazkur soha mutaxassisi qolmadi.

Xabaringiz bor, 2020 yilgi Pro-liganing 20-turidan o'rin olgan "Neftchi" - "Turon" uchrashuvi yakunida yuz bergan tartibbuzarliklardan so'ng Farg'ona jamoasi 3 uy uchrashuvlarini muxlislarsiz o'tkazishi bo'yicha diskvalifikaciyaga uchragan edi. Bugunga kelib "Neftchi" uchun mazkur jazo muddati yakuniga etdi. Farg'onaliklar o'z maydonlarida Superligaga o'tish o'yinida "Andijon", Pro-liganing 1-turida "Olimpik" va mazkur chempionatning 3-turida "Istiqlol" jamoalari bilan belgilangan 3 ta uy uchrashuvini o'tkazib bo'lishdi. Endilikda "Neftchi"ning o'z maydonida o'tadigan o'yinlarida muxlislar ham ishtirok etishlari mumkin bo'ladi.

Jamoa kuni kecha, yani 12 aprel kuni Pro-liganing 4-turi doirasida Nukusning "Aral Samali" klubini mag'lub etdi.17 aprel sanasida esa, mazkur chempionatning 5-turida o'z maydonida Urganchning "Xorazm" klubini qabul qiladi. Bu jamoalar ayni damda musobaqa jadvalida bir xil, 10 ochkodan jamg'argan xolda to'plar nisbatiga ko'ra birinchi va ikkinchi o'rinlarni egallab turishibdi. Bizga malum bo'lishicha, mazkur o'yinda farg'onaliklar muxlislar tashrifi bo'yicha Pro-liga rekordini o'rnatishmoqchi ekan. Bu o'yinning dam olish kunlarida bo'lib o'tishi ham shu sanada "Istiqlol" stadioniga ko'plab futbol muxlislari tashrif buyurishlariga zamin yaratishi, shuningdek jamoasini qo'llab-quvvatlash uchun Xorazmdan ham bir qator muxlislar etib kelishi katta ehtimol. Farg'ona jamoasi muxlislari esa hozirdanoq ushbu o'yinga bo'lgan tayyorgarlikni boshlab yuborishgan.

Bekzod Tolibov