“Paxtakor-79” xotirasi yod etildi (fotogalereya)

Yosh avlod vakillari ularning o'yinini ko'rmagan, lekin katta avlod vakillari ular haqida jo'shqinlanib so'zlab, ko'zlariga yosh olishadi.

Bugun erta tongdan “Paxtakor” stadioni hududida joylashgan yodgorlik atrofida o'zbek futbolida faoliyat olib borayotgan yoshu-qari jam bo'ldi. Klub rahbariyati va futbolchilari, aviahalokatda halok bo'lganlarning yaqinlari va oila azolari, O'FF vakillari va futbolimiz faxriylari ishtirok etishdi.

Tadbirda qatnashganlar orasida Sardor Rahmatullaev, Asqar Tolibjonov, To'lagan Isoqov, Narimon Jalolov, Birodar Abduraimov, Evgeniy Valickiy, Mirjalol Qosimovni ko'rish mumkin edi. SHuningdek, “Bunyodkor” va “Lokomotiv” futbol klubi vakillari ham tadbirga tashrif buyurishdi.

Ushbu tadbirni taniqli jurnalist Mirzahakim To'xtamirzaev olib bordi. Unda To'lagan Isoqov, Evgeniy Valickiy, shuningdek faxriy muxlislar so'zga chiqishdi. SHundan so'ng “Paxtakor” stadionidagi yodkorlikka gulchambarlar qo'yildi.

Tadbirning ikkinchi qismida yig'ilganlar Toshkentdagi Botkin qabristoniga yo'l olishdi. U erda Narimon Jalolov, Idgay Tazetdinovning turmush o'rtog'i, klubning faxriy muxlislari so'zga chiqishdi. Xotirlash marosimida 1979 yil samoda mangu qolib ketgan futbolchilarga bag'ishlangan sherlar ham tinglandi. Botkin qabristoniga “Paxtakor” va “Bunyodkor” jamoasining futbolchilari kelib “Paxtakor-79”ni xotirlashdi, “Lokomotiv” klubi vakillari ham yodkorlikka gulchambarlar qo'yishdi. Ushbu tadbirni nafaqat mahalliy telekanal, balki xorij telekanallaridan biri ham yoritgani etiborga molik.

Bugun kun davomida “Paxtakor-79” xotirasiga bag'ishlangan tadbir va o'rtoqlik uchrashuvi o'tkaziladi.


Tolibjon Qosimov

Suratlar muallifi: X.Xoliqov.