O'zbekiston U-18 terma jamoasi mashg'ulotlarni davom ettirmoqda, bugun navbatdagi nazorat o'yini o'tkaziladi

Yig'in ikki bosqichda o'tkazilib, unda 50 nafar futbolchi qatnashishi rejalashtirilgan. Yig'inning birinchi qismida terma jamoaga asosiy nomzod bo'lgan 25 nafar futbolchi sinovdan o'tkazildi. SHu bilan birga bir qator nazorat uchrashuvlari ham tashkil etildi. Jumladan, Otabek G'ulomxo'jaev shogirdlari "Bunyodkor" yoshlarini 2:0 hisobida, "Lokomotiv" yoshlarini esa 4:2 hisobida mag'lubiyatga uchratishdi.
 
Ayni paytda O'zbekiston U-18 terma jamoasi yig'inining ikkinchi qismi boshlandi. Bu yig'inga ham yana 25 nafar futbolchi taklif etilgan.
 
Otabek G'ulomxo'jaev mazkur yig'in davomida terma jamoaning asosini shakllantirish bilan birga, yangi futbolchilarni ham sinovdan o'tkazib olmoqda.

"Yig'inni ikki qismga bo'lib o'tkazishdan asosiy maqsad iloji boricha ko'proq futbolchilarni sinovdan o'tkazib olish. 25 nafardan iborat ikkita tarkib bir-biriga raqobat paydo qiladi. Hech qaysi futbolchi asosiy tarkibdagi o'rnim kafolatlangan, degan xayolda xotirjam bo'lmaydi. Doimo o'z ustida ishlashi, mashg'ulotlarda astoyidil mehnat qilishi talab etiladi.
 
Hozirgi tarkib bilan ko'proq taktik mashg'ulotlar o'tkazmoqdamiz. Ular bilan qanday himoyalanish, himoyadan hujumga o'tish, standart vaziyatlarda jarima maydonchasi ichida qanday joylashish bo'yicha mashqlar olib boryapmiz. Futbolchilar bizning g'oyalarimizni tushunib, kundan kunga ko'rsatmalarimizni yaxshiroq bajarishyapti. Asosiy maqsadimiz faqat Osiyo chempionati saralashiga tayyorgarlik ko'rish emas. Osiyo chempionatiga yo'llanmani qo'lga kiritish, keyin u erda muvaffaqiyatli qatnashib, Jahon chempionatida ishtirok etish shubhasiz bosh maqsadimiz. SHu bilan birga biz mazkur futbolchilarni bo'lajak milliy va Olimpiya terma jamoalariga tayyorlab borishni ham rejalashtirganmiz", - dedi O'zbekiston U-18 terma jamoasi bosh murabbiyi Otabek G'ulomxo'jaev.
 
Bugun terma jamoa azolari "Nurafshon" jamoasiga qarshi nazorat o'yini o'tkazish rejalashtirilgan.