O'zbekiston futbol hakamlar markazi rahbari: "Endi hakamlar o'yin natijasiga tasir ko'rsatadigan qaror qabul qilsa, umrbod futboldan chetlashtiriladi"

O'FA anjumanlar zalida davom etayotgan tanqidiy ruhdagi yig'ilishda so'z olgan Laziz Qo'chqorov keskin fikrlarni bildirib, endi natijaga tasir ko'rsatgan hakam butun umrga futboldan chetlashtirilishini malum qildi.

"Kechasi soat 2 gacha uyqu kelmadi. Hakamlik qilayotgan sizlarsizlar, ammo noroziliklar bizga kelyapti. O'ylaymanki, bu odamgarchilikka ham to'g'ri kelmaydi. Sizlar (hakamlar – tahr.) uyingizda, oila bag'rida maza qilib uxlayapsizlar. Biz uchun esa dam olish kunlari ham tatimayapti. 

Nega o'yinlar shanba-yakshanba kunlariga qo'yiladi bilasizlarmi, hakamlar? Hamma maza qilib hordiq chiqarsin, muxlislar futbol ko'rib, dam olsin, degan maqsadda qilinadi. Sizlar butun jamoa – associaciya, PFL, hakamlar markazi, inspekciya, "Sport" telekanali va OAV bilan hakamlarga ko'maklashib, jips bo'lib ishlaymiz deganda, sizlarni nima haqqingiz bor o'yinni buzishga? Bunga kim huquq berdi? Kimdir agar sizlarga topshiriq berayotgan bo'lsa, ochiq-oydin aytinglar. Kim aytoladi? Buning chegarasi bormi-yo'qmi?

To'g'ri, televidenie, kamera, VAR bilan bog'liq o'ziga yarasha muammolarimiz  bor. Bu narsalar ustida ishlayapmiz, rahbariyatga taklif bildiryapmiz. Lekin bularni amalga oshirish uchun yuzimizni yorug' qilib olishimiz kerakmi-yo'qmi?

Muxlislar norozi. Hech izohlarni o'qiysizlarmi? Hamma so'kkan, birorta ijobiy fikr yo'q. SHu ishga kelganimdan beri unaqa izoh o'qimadim. 

Yillar davomida ishonch yo'qolgan. SHu ishonchni qaytarish uchun harakat qilyapmiz. 

Sizlar chiqargan qarorni hech kim tushunmayapti. Biz qachon maqtov eshitamiz?

Kecha rahbariyatga taklif kiritdim. Tartib-intizom kodeksini keyingi yildan o'zgartiramiz, uni hozirdan ishga tushirdik. Endi hakamlar o'yin natijasiga tasir ko'rsatadigan qaror qabul qilsa, umrbod futboldan chetlashtiriladi. Gapirdimmi, shu ishni qilaman", – dedi Laziz Qo'chqorov.