O'zbekiston futbol associaciyasi O'zbekiston Davlat Jismoniy tarbiya va sport universiteti bilan hamkorlikni yo'lga qo'ydi

Mazkur hamkorlikdan asosiy maqsad Universitet talabalari orasida futbol hakamligi va murabbiyligi bilan shug'ullanish istagida bo'lgan yoshlarni har tomonlama qo'llab-quvvatlash, xalqaro musobaqalarda faoliyat olib boradigan iqtidorli hakamlar va istedodli murabbiylarni tayyorlashdan iborat.
 
O'FA Murabbiylar tayyorlash departamenti va Hakamlar va nazoratchilar departamenti tomonidan O'zbekiston Davlat Jismoniy tarbiya va sport universiteti yuqori kurs talabalari bilan turli uchrashuvlar tashkil etib, ular orasida hakamlik va murabbiylikka iqtidori bor yoshlar tanlab boriladi. Ular bilan birgalikda turli nazariy va amaliy mashg'ulotlar olib borilib, kasbga bo'lgan layoqati sayqallab boriladi. SHuningdek, turli musobaqalar tashkil etib, Universitet talabalarining iqtidori mazkur musobaqalarda sinab ko'riladi. Ularga to'g'ri yo'nalish berib, xato va kamchiliklar tahlil qilib boriladi.
 
Joriy yilning 2 mart kuni O'zbekiston Davlat Jismoniy tarbiya va sport universitetida talabalar bilan dastlabki uchrashuv o'tkazish rejalashtirilgan. Ushbu uchrashuvda taniqli hakam, FIFA referisi Ravshan Ermatov o'z guruhi bilan ishtirok etadi.