"O'zbekiston bu salohiyati bilan 3-4 marotaba Jahon chempionatiga chiqishi kerak edi" - Qozog'istonlik jurnalist Erbol Kairov bilan intervyu

Qozog'istonlik mutaxassis va jurnalist Erbol Kairov bilan suhbatimiz davomida ikki mamlakat futbolidagi farqlar, "Qayrat" klubining yutuqlari va O'zbekiston terma jamoasining bugungi ahvoli haqida so'z bordi. 

— So'nggi yillarda O'zbekiston va Qozog'iston terma jamoalari turli yosh toifalarida tez-tez to'qnash kelmoqda. Sizningcha, bu uchrashuvlardagi eng yaqqol farq nimada?

— Menimcha, O'zbekiston terma jamoalari har tomonlama — texnik jihatdan ham, fikr tezligi jihatidan ham — qozog'istonlik futbolchilardan ustun. Qozog'istonda esa ko'proq jismoniy tayyorgarlik va atletizmga etibor qaratilgan. Shu bois o'yin uslublaridagi asosiy farq ham shunda namoyon bo'ladi.

— "Qayrat" klubining UEFA Chempionlar ligasida qatnashishi — bu Qozog'istonning o'z vaqtida UEFAga o'tgani samarasi, deb bo'ladimi? Axir "Real" bilan o'yinlar o'z-o'zidan bo'lib qolmaydi-ku?

— Bu, avvalo, klubning o'zi olib borgan izchil ishning samarasi. Albatta, bu natijada "Qayrat"ning sobiq prezidenti Qayrat Boranboevning xizmatini aytib o'tish lozim. Agar u kishi bo'lmaganida, UEFA Chempionlar ligasi haqida gap bo'lmasdi. Federaciya yoki boshqa klublarning bu muvaffaqiyatga deyarli aloqasi yo'q. Shu bilan birga, Qozog'istonning UEFAga o'tish jarayonida katta hissa qo'shgan Qozog'iston futbol ittifoqining sobiq vice-prezidenti Tlekbek Akpaevni ham alohida takidlab o'tish kerak.

— Hozirgi O'zbekiston terma jamoasi haqida qanday fikrdasiz? Fabio Kannavaro haqidachi?

— O'zbekiston – Qatar o'yinini shaxsan stadionda tomosha qildim. Sizlar Osiyo chempionlaridan yaqqol ustun edingiz. Bu Kapadze rahbarligida jamoaning jipslashganidan darak. Ilgari ham O'zbekiston termasini qiziqish bilan kuzatardim: Qosimov, Jeparov, Nesterov, Kapadze, Geynrix, Bikmaev kabi futbolchilar davri men uchun eng yorqin davr edi. Afsuski, Jahon chempionati yo'llanmasi faqat bu yilgina qo'lga kiritildi. Holbuki, sizning salohiyatingiz bilan O'zbekiston kamida 3–4 marta u erda bo'lishi kerak edi. Bu erda, albatta, Osiyodagi adolatsiz hakamlik va boshqa omillar ham tasir qilgan. Shu bois Qozog'iston o'z vaqtida UEFAga o'tishni maqul topgandi.

— Sizningcha, Qozog'iston chempionatida o'ynagan eng yaxshi o'zbek futbolchisi kim?

— Men uchun bu, avvalo, Geynrix, Kapadze, Bakaev, Davletov va Bikmaev. Juda afsuski, Jeparov Qozog'istonda uzoq o'ynamadi. Agar u ko'proq vaqt to'p tepganida, shubhasiz, ligamizning yulduziga aylangan bo'lardi.

— Kelasi jahon chempionatida sizningcha, qaysi jamoa favorit va qaysi jamoa kashfiyot bo'lishi mumkin? Masalan, oxirgi musobaqada Marokash shunday bo'lgandi.

— Juda istardimki, kashfiyot jamoa aynan O'zbekiston bo'lsin. Sizning yutuqlaringiz Qozog'iston hukumati va futbol rahbarlarini ham akademiyalar va infratuzilma rivojiga jiddiy etibor qaratishga undaydi. Men har doim O'zbekiston terma jamoasi uchun qayg'uraman va ularga muvaffaqiyat tilayman.