Osiyo Kubogi-2019. Stadionlar muxlislarni qabul qilishga tayyor

Atigi uch kundan keyin BAA - Bahrayn uchrashuvi bilan navbatdagi Osiyo Kubogiga start beriladi. BAA poytaxti Abu Dabidagi "Zayed Sports City" stadioni musobaqaning ham ochilish, ham final bahsiga mezbonlik qiladi. Mazkur stadion sig'imi 43,000 muxlisga mo'ljallangan bo'lib, o'yingoh Abu Dabi xalqaro aeroportidan 20 km. uzoqlikda joylashgan.

Abu Dabida yana bitta stadion mavjud bo'lib, "Mohammad Bin Zayed Stadium" deb nomlanadi va sig'imi 40,000 o'rindiqqa ega. Bu o'yingohda futboldan tashqari bazan kriket bellashuvlari ham o'tkazib turiladi. Abu Dabidagi uchinchi stadion "Al Nahyan Stadium" deb nomlanadi va bu erda beshta uchrashuv o'tkaziladi.

Osiyo Kubogi o'yinlariga Dubaydagi ikkita stadion mezbonlik qiladi. "Al Maktoum Stadium" unchalik katta emas. 15,000 muxlisni o'z bag'riga sig'dira oladigan ushbu arena metroga juda yaqin joylashgan hamda bu erda oltita o'yin o'tkaziladi. Dubaydagi ikkinchi stadion "Rashid Stadium" bo'lib, bu erda O'zbekiston - Turkmaniston uchrashuvi o'tkaziladi. Umuman aytganda bu erda musobaqaning 5ta o'yini bo'lib o'tadi.

Dubaydan uzoq bo'lmagan SHarjadagi "Sharjah Stadium" 11,000 tomoshabinga mo'ljallangan bo'lib, bu erda 6ta o'yin o'tkaziladi. Osiyo Kubogi o'yinlari o'tkaziladigan to'rtinchi shahar esa Al Ayn. Bu erda ikkita stadion bahslarni o'zida qabul qiladi. Sig'imi 25,000 bo'lgan "Hazza Bin Zayed Stadium" 8ta uchrashuvga mezbonlik qiladi. Birmuncha kichikroq "Khalifa Bin Zayed Stadium"da esa 6ta o'yin bo'lib o'tadi. Ushbu arena o'z bag'riga 16,000 ishqibozni sig'dira oladi.