Oliy liga-2014. Ko'zguda – “Olmaliq”

Odatdagidek bu yil oliy ligada ishtirok etuvchi jamoalar haqida qisqacha to'xtalishda davom etamiz. Demak, ko'zguda – “Olmaliq”.

O'TGAN YILGI O'RNI: 5
“Olmaliq” uchun o'tgan mavsum yaxshi yakun topdi. Jamoa 5-o'rinni qo'lga kiritdi. Jamoa bu yil ham kuchli beshlikka kirish uchun kurash olib borishini malum qildi.

BOSH MURABBIY: Igor SHkvirin
“Olmaliq” oliy ligada ishtirok etishni boshlaganidan beri klubni Igor SHkvirin boshqarib kelyapti. SHkvirin – malakali murabbiy, u iqtidorlarni ko'ra oladi. Bundan tashqari, hadeb natijaning ortidan quvishdan ko'ra yosh kadrlarni tarbiyalab chiqarishni maqul deb biladi.

ENG YAXSHI XARID: Aleksandr Alempievich (Serbiya)
Tunislik SHaker Zuagi borasida hozircha malumotga ega emasmiz. Lekin o'zim ko'rgan o'yinlarda jamoaning serbiyalik legioneri Aleksandr Alempievich iliq taassurot qoldirdi. Bu futbolchi tez orada mashhur bo'lib ketsa ajab emas.  

ENG KATTA YO'QOTISH: Bahrom Yuldashev
Jamoa uchun Bahrom Yuldashev ham ancha mehnat qildi. Uning hali ko'p foydasi tegishi mumkin edi, biroq klub o'z qarorini tanladi va futbolchi bilan xayrlashdi. Lekin Bahromning o'rnini Azamat Isroilov bilan Obid Jo'raboev bilintirmasa kerak.

JAMOA ETAKCHISI: Sanjar SHoahmedov
Sanjar SHoahmedov uchun “Olmaliq”ning yaqqol etakchisi bo'lish fursati keldi. Maydon markazida va hujumchi ortida birdek harakat qila oladigan SHoahmedov bu yil ham o'zini ko'rsatmasa bo'lmaydi. O'zbek futboliga mana shunday kadrlar kerak.

O'ZINI KO'RSATISHI KUTILAYOTGAN FUTBOLCHI: Diyor Turopov
Jizzaxlik Diyor Turopovda ham iqtidor yashirinib yotibdi. Uni esa Igor SHkvirini ochishi mumkin. Turopov o'tgan yil jahon chempionatida o'zini ko'rsata olgandi. U “Olmaliq”da ham yarq etib porlashi kerak.

CHEMPIONATNI KIMGA QARSHI BOSHLAYDI: uyda “Metallurg”
“Olmaliq” 1-turni bir kun keyin yani, 16 mart kuni o'tkazadi. Jamoa shu kuni o'zining yangi stadionida “Metallurg”ni qabul qiladi.

Xayrulla Xoliqov.