Igor Sergeev: "Shkvirin va Ahmedovni ortda qoldirdim? Termada shaxsiy statistika emas, jamoa manfaati muhimroq"

– O'yin haqida taassurotlaringiz...

– Matbuot anjumanida aytganimdek, Xudoga shukr, g'alaba qozondik. Umuman olganda, o'yinni yaxshi boshladik, to'g'ri, bazi mayda xatolar bo'ldi, lekin yaxshi boshladik, gol urdik, o'yinni nazorat qildik, ikkinchi golni ham kiritdik. Keyin vaziyat biroz murakkablashdi, qizil kartochka ishimizni qiyinlashtirdi, ustiga-ustak darvozamiz tomon penalti belgilandi. Xullas, yigitlarga barakalla deyman, g'alabani saqlab qolishdi. Barcha futbolchilar kuch-g'ayratini ayamadi. Endi eng muhimi – tiklanish va keyingi o'yin haqida o'ylash.

– Dublingiz orqali terma jamoadagi gollar soni bo'yicha Igor Shkvirin va Odil Ahmedovni ortda qoldirdingiz.

– Ha, menga bu haqda savollar berishdi. Men bu haqda o'ylamayman. Aslida, matbuot anjumanida aytganimdek, terma jamoa uchun gol urish doimo yoqimli. Ha, gol urishni xohlayman, lekin men terma jamoadaman. Bu erda shaxsiy statistika yoki ko'proq gol urish haqida emas, balki jamoa manfaati haqida o'ylash kerak. Agar pas berish kerak bo'lsa, albatta pas beraman, chunki terma jamoaga natija kerak. Shaxsiy statistikaning ahamiyati yo'q. Zarur bo'lsa, murabbiyning ko'rsatmalarini bajarish kerak. Odil Ahmedov va Igor Shkvirin haqida o'ylamagandim. Ochig'ini aytsam, hozir menga aytilgan fakt haqida ham bilmasdim. Men bu malumotlarni ko'rmaganman. Bundan keyin ham ko'proq gol urishga harakat qilaman.

– Bugungi o'yindagi gollar tafovuti turnir jadvalimizdagi yakuniy o'rnimizga tasir qilib qolmaydimi?

– Ha, lekin aslida hozir bizda hamma ko'rsatkichlar bir xil-ku, to'g'rimi? Gollar bo'yicha ham durang, O'mon ham 2:1 hisobida g'alaba qozondi, biz ham 2:1 hisobida yutdik. Menimcha, qirg'izlar bilan o'yin hal qiluvchisi bo'ladi. Shunchaki g'alaba qozonish emas, balki iloji boricha ko'proq gol urishga harakat qilamiz. O'monning uchinchi o'yinni qanday o'tkazishini vaqt ko'rsatadi. Birinchi o'ringa chiqish uchun barcha imkoniyatlardan foydalanamiz. 

– Tarkib ekstremental ekanligi tushunarli. Lekin bizning terma jamoamiz yirikroq g'alaba qozonishi kerakdek tuyulmayaptimi? Biz ham 2019 yil Osiyo kubogida Turkmanistonni 4:0 hisobda mag'lub etgan edik. 

– Bu futbol. Bugun, aslida, birinchi bo'limni 2:0 hisobida yakunladik, ammo deyarli ikkinchi bo'lim boshlanishida qizil kartochka oldik, bu ham o'z tasirini ko'rsatdi. Qizil kartochka bo'lmaganida, ehtimol, ko'proq gol urardik. Futbolda har safar bir xil natija bo'lavermaydi. Shuning uchun avvalroq aytganimdek, yigitlar rahmat, g'alabani saqlab qolishdi. Garchi yangi o'yinchilar bo'lsa-da, ular hali to'liq jamlana olmagan, ko'pchiligi uzoq vaqtdan beri birga o'ynamagan bo'lsa-da, g'alabani qo'ldan chiqarishmadi. Ha, moslashish uchun, taktik ko'nikmalarni o'zlashtirish uchun vaqt kerak. Har bir o'yinda g'alaba qozonishga harakat qilamiz. Bu O'mon bo'ladimi yoki Qirg'iziston bo'ladimi, ehtimol, statistika yoki boshqa ko'rsatkichlarga ko'ra katta hisobda yutishimiz kerakdir. Lekin bu futbol, aynan shuning uchun ham u qiziqarli.