O'FA rahbariyati Olimpiada oldidan O'zbekiston U-23 terma jamoasi bilan uchrashdi

O'zbekiston U-23 terma jamoasi guruh bosqichida Ispaniya, Misr va Dominikan Respublikasi jamoalariga qarshi bahs olib boradi.

Bugun ushbu muhim turnir oldidan O'zbekiston U-23 terma jamoasi azolari bilan uchrashuv tashkil etildi. Unda O'FA, Sport vazirligi va MOQ rahbariyati ishtirok etdi. Jamoa oldida turgan ushbu musobaqa haqida fikr bildirilar ekan, Olimpiadani butun xalqimiz, xususan, Prezidentimiz ham katta qiziqish bilan kuzatib borishi aytib o'tildi. O'zbek futboli tarixida ilk bora Olimpiada yo'llanmasi qo'lga kiritilishi katta voqea ekanligi, biroq galdagi muhim vazifa — ushbu musobaqada munosib ishtirok etgan holda medallar uchun kurashish zarurligi takidlandi. 

"Yoshlik bu — imkoniyat. Sizlarni butun xalqimiz kuzatib turibdi. Bor kuch-g'ayratingizni ishga solib, munosib ishtirok etishingizga ishonamiz",- dedi O'FA prezidenti Abdusalom Azizov. 

O'z o'rnida jamoamizning bir qator etakchi futbolchilari ham fikrlarini bildirib o'tishdi. Murabbiylar shtabi bilan jamoaning ayni paytdagi holati va tayyorgarlik jarayoni haqida suhbatlashildi. Tibbiy shtabga  futbolchilarning sog'ligi, tiklanishi va vitaminizaciyalash jarayoni, shuningdek, futbolchilarga yuqori darajadagi tibbiy yordam ko'rsatish amaliyotini davom ettirish ko'rsatmasi berdi.

Uchrashuv yakunida ushbu masuliyatli turnir oldidan jamoaga yana bir bor omad tiladilar.