OCHL. Bugun chorak final start oladi

BAAning “Al Ayn” klubi o'z maydonida Saudiyaning “Al Ittihod” klubini qabul qilsa, Qatarning “Al Sadd” jamoasi safarda Saudiyaning boshqa bir klubi “Al Hilol” mehmoni bo'ladi.

21:00. “AL AYN” (BAA) – “AL ITTIHOD” (S.Arabistoni)

“Al Ayn” bosh murabbiyi Zlatko Dalichning aytishicha, bugungi o'yin ular uchun juda muhim ahamiyatga ega: “Biz bu yil hisobidan OCHL guruh bahslarida “Al Ittihod”ga qarshi ikkita o'yin o'tkazib, hech birida g'alaba qozona olmadik. Bundan ko'rinib turibdiki, ular juda kuchli jamoa. Ammo bu safar ularni mag'lub etishga harakat qilib ko'ramiz”.

“Al Ittihod” ustozi Xalid Al Koroni esa bugungi o'yin oldidan quyidagi fikrlarni bildirdi: “Biz “Al Ayn” to'sig'idan o'tishimizga ishonamiz. Hozir shogirdlarim kuchga to'lib turishibdi, bu esa bizga yordam berishi aniq. Ushbu bahsga tayyorgarlik jarayonini Gollandiyada olib bordik va hammasi yaxshi kechdi”.

22:55. “AL HILOL” (S.Arabistoni) - “AL SADD” (Qatar)

Saudiyaning “Al Hilol” klubida murabbiy o'zgardi. SHu paytgacha jamoani boshqarib kelgan Sami Al Jaber o'rnini Loren Regekamp egalladi. Ushbu murabbiy bahsdan oldin ushbu gaplarni aytib o'tdi: “Men yigitlarga guruh bosqichida “Al Sadd”ni yirik hisobda enganimiz hech narsani anglatmaydi deb aytib o'tdim. CHunki bu pley-off bosqichi va bunda har narsa bo'lishi mumkin”.

Qatarning “Al Sadd” klubini esa Lyusseyn Ammuta boshqarmoqda. Uning aytishicha, “Qirol Fahd” stadionida g'alaba qozonish oson ish emas. Murabbiy bu haqda shunday dedi: “Al Hilol” juda kuchli jamoa. Ular Osiyo futbolida o'z o'rniga ega. Lekin oxirgi yillarda biz ham o'sishga erishdik. Agar yarim finalga chiqa olsak, o'zimizni nihoyatda baxtiyor his qilgan bo'lamiz.