Nurlibek Talasboev: “Quvasoylik muxlislar jamoani sezilarli ravishda qo'llab-quvvatlamoqda”

Uchrashuvdan so'ng quvasoyliklar hujumchisi Nurlibek Talasboev o'z fikrlarini bildirib o'tdi. Malumot uchun aytish kerakki, ushbu iqtidorli futbolchi qoraqalpog'istonlik bo'lib, 1994 yilda tavallud topgan. Bungacha asosan “Orol” sharafini himoya qilib kelayotgandi. Kechagi uchrashuvda Talasboev o'z hisobiga gol yozdirib qo'yishga erishdi.

- Ochig'ini aytganda, bugungi uchrashuvda jamoamiz favorit edi. SHu bois maydonga faqat g'alabani ko'zlagan xolda chiqqandik. Yaratganga shukur, maqsadimizga erishdik. Endi bor etiborimizni keyingi o'yinga qaratamiz. Oldinda bizni “Nurafshon”ga qarshi jiddiy o'yin kutib turibdi. Imkon qadar bo'lajak bahsda ham muxlislarimizni xursand qilishga xarakat qilamiz.

- “G'ijduvon” darvozasiga kiritgan to'pim jamoamga foyda keltirganidan xursandman. Bu erda ham murabbiylar meni hujum chizig'ida o'ynatmoqda. O'zingizga yaxshi malum, oldingi chiziq vakilidan faqat gol urish talab etiladi.

- “Cementchi”ga moslashish jarayoni uzoq davom etmadi. Aksincha yigitlar meni yaxshi qabul qildi va qisqa fursat ichida jamoaga kirishib keta oldim deb o'ylayman. “Cementchi”da yaxshi kollektiv yig'ilgan deya olaman.

- Jamoaga yaratib berilayotgan sharoitlar qoniqarli darajada. Buning uchun rahbariyatga minnatdorchilik bildirsak arziydi. Ular futbolchilarga qo'ldan kelganicha sharoitlarni yaxshilab bormoqda. Faqat o'ynash kerak.

- Bemalol ayta olamanki, vodiyda xalq futbolni juda sevadi. Quvasoylik ishqibozlar borasida ham iliq fikrdaman. Ular jamoani sezilarli ravishda qo'llab-quvvatlamoqda. Bu esa tabiiyki biz futbolchilarga qo'shimcha kuch bag'ishlaydi.


Islombek Rustambekov.