"Neftchi" sardori sariq olishi, Bobir Abdixoliqov esa to'g'ridan-to'g'ri qizil olishi kerak edi. 17-turdagi bahsli vaziyatlar yuzasidan Ekspert-hakamlar komissiyasi xulosasi

Joriy yilning 27 avgust sanasida Superliga 2024 yilgi mavsumning 17-turi yakuniga etdi. O'zbekiston futbol hakamlari markazi mazkur uchrashuvlar tugagach, Ekspert-hakamlar komissiyasining navbatdagi yig'ilishini o'tkazdi va tur doirasida kuzatilgan bahsli vaziyatlar tahlil qilindi. Bu bellashuvlarda jami 5 ta bahsli vaziyat yuzaga keldi.

Quyida ularning batafsil izohi va chiqarilgan yakuniy qarorlar bilan tanishishingiz mumkin:

1-vaziyat. "Metallurg" - "Dinamo" to'qnashuvi: mehmonlarning goli.

"Metallurg" - "Dinamo" uchrashuvining 45+1-daqiqasida mehmonlar hisobni ochdi. Bosh hakam Nayim Qosimov o'yindan tashqari holat qayd etilmaganini va gol toza urilganini qayd etdi.

Ekspert-hakamlar komissiyasi qarori: Bu vaziyatda mehmonlarning 9-raqamli hujumchisi o'yindan tashqari holatda bo'lgan. Ammo u to'p uchun harakat qilmagan. Ekspert-hakamlar komissiyasi tomonidan bosh hakamning qarori to'g'ri, deb topildi.

2-vaziyat. "Neftchi" - "Olimpik" qarama-qarshiligi: bahsli vaziyat.

"Neftchi" - "Olimpik" uchrashuvining 10-daqiqasida mehmonlar jarima maydoni ichida maydon egalarining 20-raqamli futbolchisi toshkentliklarning 18-raqamli futbolchisining qorin qismiga zarba berdi. Bosh hakam Ibrohim Ismoilov futbolchini og'zaki ogohlantirdi.

Ekspert-hakamlar komissiyasi qarori: Bu vaziyatda farg'onaliklar vakili raqibiga nisbatan atayin qo'pol harakat qilgan. Mazkur holatda futbolchi sariq kartochka bilan jazolanishi kerak edi. Ekspert-hakamlar komissiyasi tomonidan hakamning qarori noto'g'ri, deb topildi.

3-vaziyat. "Lokomotiv" - "Qizilqum" qarama-qarshiligi: bahsli penalti.

"Lokomotiv" - "Qizilqum" uchrashuvining 51-daqiqasida mehmonlar qulay vaziyatga ega bo'ldi. To'p toshkentliklar jarima maydoniga uzatilgandan so'ng u nominal mezbonlar vakilining qo'liga tegdi. Bosh hakam G'ayrat Jo'raev dastlab uchrashuvni davom ettirdi. Ammo VAR hakami uni monitor yoniga chaqirgach, referi nuqtaga ishora qildi.

Ekspert-hakamlar komissiyasi qarori: Bu vaziyatda himoyachining qo'li notabiiy holatda turibdi. Bu kabi hollarda penalti belgilanishi lozim. Ekspert-hakamlar komissiyasi hakamlarning qarorini to'g'ri, deb hisoblaydi.

4-vaziyat. "Nasaf" - "Andijon" qarama-qarshiligi: qizil kartochka.

"Nasaf" - "Andijon" uchrashuvining 76-daqiqasida mezbonlarning 10-raqamli futbolchisi andijonliklarning 19-raqamli azosining oyog'iga butsasining tag qismi bilan zarba berdi. Bosh hakam Asker Najafaliev futbolchiga ikkinchi sariq kartochka ko'rsatdi va uni maydondan chetlatdi.

Ekspert-hakamlar komissiyasi qarori: Bu vaziyatda futbolchi raqibiga nisbatan atayin qo'pollik ishlatgan. Bu kabi hollarda futbolchi ehtiyotsizligi uchun to'g'ridan-to'g'ri qizil kartochka bilan jazolanishi lozim. Ekspert-hakamlar komissiyasi hakamning qarori noto'g'ri ekanini malum qiladi.

5-vaziyat: "Bunyodkor" - OKMK o'yini: bahsli 11 metrlik jarima zarbasi.

"Bunyodkor" - OKMK uchrashuvining 59-daqiqasida nominal mezbonlar jarima zarbasiga ega bo'ldi. To'p jarima maydoniga uzatilgach, olmaliqliklarning 9-raqamli futbolchisi elka qismiga tekkan. Bosh hakam SHavkat Nasibullaev bahsni davom ettirdi.

Ekspert-hakamlar komissiyasi qarori: Bu vaziyatda mehmonlar futbolchisi to'p uchun kurashgan va to'p uning elka qismiga tekkan. Bu kabi hollarda uchrashuv davom ettirilishi lozim. O'z-o'zidan penalti belgilash uchun asos etarli emas. Komissiya bosh hakamning qarorini to'g'ri, deb topdi.