"Neftchi": Yig'in davom etmoqda

Dastlabki besh kun futbolchilar bir mahaldan shug'ullandi. Tiklanish jarayoni bo'lgani uchun mashg'ulotlar engilroq tarzda o'tdi. 15 dekabrdan boshlab esa mashg'ulotlar kuniga ikki mahaldan o'tmoqda. Rejaga ko'ra 27 dekabr kuni ilk yig'in yakuniga etadi.

Jamoada o'zgarishlar bor. Bungacha texnik-direktor sifatida faoliyat yuritib kelgan Sulton Zaylobidinov o'rnida endilikda SHerzod Raimjonov ish olib boradigan bo'ldi. SHuningdek yoshlar jamoasi murabbiyi Sergey Kovshov bilan ham do'stona ravishda xayrlashdik. Kelgusida yoshlar jamoasini Bahrom Haydarov boshqarib boradi. Aytish lozimki, yoshlar jamoamiz 15 dekabrdan yig'inni boshlagan.

Tabiiyki tarkibdagi o'zgarishlar bugungi kunda muxlislarning diqqat markazida turibdi. Joriy mavsum "Neftchi" sharafini himoya qilgan Iqbol Boboxonov, Aleksandru Onika, Vyacheslav Ponomaryov, Andrey Akopyanc bilan xayrlashdik. Bulardan tashqari shartnomasi tugab borayotgan Ro'zimboy Ahmedov ayni damda Qozog'istonning "Qaysar" klubida ko'rikdan o'tmoqda. Himoyachi Dilyorbek Irmatov esa o'zini "Bunyodkor"da sinab ko'rishga ahd qildi.

Bu yil o'zini ko'rsatishga erishgan iqtidorli futbolchilar Murodbek Bobojonov va Javohir Rasulov bilan amaldagi shartnoma muddati yana uzaytirildi. Bu borada yana boshqa etakchi o'yinchilar bilan ham muzokara davom etmoqda.