“Neftchi” FK Uchko'prik tumanidagi bolalar futbol maktabiga tashrif buyurdi

Klub rahbariyati tashabbusi bilan o'tkazilgan tadbirda jamoa nomidan bosh murabbiy Murod Ismoilov, murabbiy Andrey Fyodorov hamda futbolchilar Akmal Xolmatov, Aleksandru Onika va Sardor Mirzaev ishtirok etdi. Taniqli nomlarning tashrifi tabiiyki u erda futbol sir-asrorlarini o'rganayotgan bolalarda katta qiziqish uyg'otdi.

“Neftchi” ustozi futbol maktabida yoshlar bilan ishlayotgan murabbiylar bilan suhbatlashib, u erdagi iqtidorli o'yinchilar haqida malumot oldi va ularga kerakli ko'rsatmalar berdi. Jamoa sardori Akmal Xolmatov boshchiligidagi futbolchilar esa yoshlarga master klass o'tkazib, o'z tajribalari bilan o'rtoqlashdi. Bu esa futbol maktabidagi yoshlarga kelajakda qo'l kelishi turgan gap. Ularning o'zlari ham bundan benihoyat xursand ekanligini yashirmadi. SHuningdek “Neftchi” azolarining futbol maktabiga tashrifi mahalliy muxlislarda ham katta qiziqish uyg'otdi. SHu kuni stadionga kirib bevosita master klassni kuzatgan ashaddiy ishqibozlar soni ko'pchilikni tashkil etgani ham so'zimizga isbot bo'la oladi.

Tadbirdan so'ng “Neftchi” ustozi Murod Ismoilovning bu haqda fikrlari bilan qiziqdik.

- Ushbu bolalar va o'smirlar futbol maktabiga tashrifdan ko'zlangan maqsad, nafaqat shahar balki tumandagi iqtidorli bolalarni izlab topib, jamoamizga jalb etishdir. Qishloqlarda istedodli futbolchilar ko'p. Biz buni yaxshi anglagan xolda, dastlabki yurishimizni Uchko'prik tumanidan boshladik. Bu erda murabbiylar bilan suhbatlashib, o'zini ko'rsatishga erishayotgan yoshlar haqida malumot oldik. Kelgusida ularni yangi ochiladigan akademiyamizga saralash jarayonida jalb etib, sinovdan o'tkazamiz. Bu tadbir hali boshlanishi. Nasib qilsa keyinchalik viloyatimizning boshqa tumanlaridagi futbol maktablarida ham bo'lib, ular bilan ham yaqindan tanishamiz. Asosiy maqsadimiz viloyatdagi iqtidorli yoshlarni topib, ularni kelgusida “Neftchi” uchun foydasi tegadigan o'yinchi qilib etishtirishdir – deydi Murod Muzaffarovich.