"Neftchi" chempion bo'lgan oxirgi mavsumda o'zbek va dunyo futboli qanday edi?
11 noy 15:46
Yangiliklar

"Neftchi" chempion bo'lgan oxirgi mavsumda o'zbek va dunyo futboli qanday edi?

Farg'onaning "Neftchi" jamoasi joriy mavsumda o'zining tarixdagi 6-chempionligini qo'lga kiritishga yaqin turibdi.

O'zbek futboli tarixidagi yorqin jamoalardan biri so'nggi bor 2001 yilgi mavsumda chempionat oltin medallariga ega chiqqan. Shundan beri oradan 24 yil vaqt o'tdi. Bosh sovrin uzoq yillar Toshkentda "Paxtakor", "Bunyodkor", "Lokomotiv" qo'lida yurdi. Keyin esa o'tgan yili "Nasaf" uni o'ziniki qildi. Bu mavsumda "Neftchi" yaqin kelyapti.

"2001 yil 9 noyabr. O'sha kuni “Neftchi” aslida 20 iyun kuni o'tkazilishi lozim bo'lgan 17-turning qoldirilgan uchrashuvida Toshkent viloyatining “Do'stlik” jamoasini qabul qildi. G'alaba Yuriy Sarkisyan boshchilik qilayotgan jamoaning tarixda 5-bo'lib oltin medallarga ega chiqishini anglatardi. Buni yaxshi anglagan “Neftchi” dastlabki daqiqalardan oldinga tashlandi. Stadionni to'ldirib o'tirgan ishqibozlar Umid Isoqov va Mansur Saidov mehmonlar darvozasini ishg'ol qilganda ajoyib xursandchilik bilan gollarni nishonlashgandi. Ayniqsa, o'yinning oxirgi daqiqalarida yaqinlashib kelayotgan chempionlikni nishonlash esda qolarli bo'lgan. Oxir-oqibat uchrashuv 2:0 hisobida farg'onaliklar muvaffaqiyati bilan tugadi. Stadion esa tom manoda “portladi”. G'alaba, chempionlik shahar ko'chalarida bayram qilingandi",- deya eslaydi hamkasbimiz Behzod Nazarov.

O'sha yili jamoa tarkibida Timur Kapadze, Mansur Saidov porlab chiqqan. Tajribali nomlardan aka-uka Do'rmonovlar, Sergey Ni, darvozada Georgi Zabirov asosiy ishni bajargan. Qizig'i biz yarim himoyachi sifatida tanigan Kapadze Sarkisyan qo'l ostida hujumda harakat qilgan, o'sha yili Superligada 8 ta o'yinda 2 ta gol urgan. Keyingi mavsumda esa "Paxtakor"ga yo'l olgan. Akmal Xolmatov, Umid Isoqov, Valentin Poddubni, Aleksandr Pisarevlar ham g'alabalarga munosib hissa qo'shgan.

“NEFTCHI”-2001

Futbolchi	Tug'.sana	O'yin	Gol
Abdumajid Toirov	05.08.1974	33	4
Akmal Xolmatov	04.04.1976	33	7
Umid Isoqov	22.12.1978	32	28
Stanislav Kudryashov	20.08.1975	32	-
Sergey Ni	03.08.1975	32	15
Vladimir Radkevich	31.03.1976	32	5
Anvar Berdiev	11.05.1978	31	14
Georgiy Zabirov	01.06.1974	31	-24
Rustam Do'rmonov	28.01.1969	26	7
Otabek Shomurodov	21.07.1974	26	-
Abdusamad Do'rmonov	15.11.1965	23	-
Mansur Saidov	01.11.1983	23	3
Valentin Poddubniy	05.07.1974	22	1
Sherzod Rayimjonov	28.04.1979	19	1
Yakub Memetov	09.07.1975	16	-
Ravshan Mataliev	05.03.1978	12	-
Ilya Kovalenko	17.04.1980	9	1
Temur Kapadze	05.09.1981	8	2
Aleksandr Pisarev	21.07.1973	8	3
Vitaliy Petrov	01.04.1974	6	-
Vladislav Filippov	22.05.1971	5	-3
Anton Nazarikov	02.07.1980	3	-
Maqsud Toirov	13.01.1978	2	-

Bundan tashqari 2001 yil futbolimizda yana nimalar bo'lganini ko'rib chiqsak.

"Keksa sinora" tarkibida ilk bor o'zbekistonlik yarim himoyachi Ilyos Zeytullaev paydo bo'ldi. Bu o'sha davr uchun haqiqatdan ham kutilmagan va shov-shuvli voqeasi sifatida qabul qilingan.

Jarohat sabab butsalarini erta mixga ilgan Shuhrat Maqsudov xayrlashuv uchrashuvini o'tkazgan. Stadionga minglab tomoshabinlar tashrif buyurgan.

Futbolimizda yangi davr boshlangan paytlar. O'zbekiston terma jamoasiga rossiyalik Vladimir Salkov olib kelingan. Lekin u ham Jahon chempionatiga olib chiqa olmagan. O'zbekiston Yaponiya va Janubiy Koreya mezbonlik qiladigan mundialdan chetda qolgan.

O'zbek futboli afsonasi Mirjalol Qosimov "Krilya Sovetov" tarkibida muhim figura bo'lib xizmat qilgan. U samaraliklar safida 46 ta o'yinda 6 ta gol urgan.

"Neftchi" hujumchisi Umid Isoqov 28 ta gol bilan chempionatning eng yaxshi to'purari sifatida qayd etilgan.

Bahrom Hakimov ustozligidagi "Nasaf" o'sha yili Osiyo Chempionlar Kubogidagi yurishini boshlagan. Yakunda "ajdarlar" yarim finalgacha etib borgan.

O'zbekiston terma jamoasi sobiq murabbiyi Ektor Kuper ECHLda "Valensiya" bilan finalda "Bavariya"ga engilgan. Qiziq fakt, Kuper 2000 yilgi mavsumda ham finalgacha etib kelgan va "Real Madrid"ga engilgan.