"Navbahor": Yoshlarimizga Lyan ustozlik qiladi

SHu paytga qadar, yoshlarimiz bilan Tohir Madrahimov va Ahmadjon Xolmirzaevlar ishlab kelishayotgandi. Klub rahbariyati o'zaro kelishgan holda murabbiylar shtabida islohotlarni amala oshirishga qaror qildi. SHu sababli, Madrahimov va Xolmirzaevlar joriy yilgi mavsumda yoshlarimiz bilan ishlamaydigan bo'lishdi. Har ikki mutaxassisga ham jamoada olib borgan faoliyatlari uchun minnatdorchilik bildirgan holda kelgusi ishlariga omad tilab qolamiz. Klub rahbariyatining qaroriga ko'ra endilikda yoshlarimizga Aleksandr Lyan ustozlik qiladi. Unga “Navbahor”ning sobiq futbolchilaridan biri SHerzod Jo'raev yordam beradigan bo'ldi. Har ikki mutaxassis ham shu kunga qadar “Navbahor” futbol klubiga qarashli “Navbahor-Umid” futbol maktabida faoliyat yuritayotganligini etirof etish joiz. Aleksandr Lyan murabbiylik sohasida uzoq yillardan beri samarali tarzda ishlab kelayotgan mutaxassislar sirasiga kiradi. Xususan, uning qo'l ostida kamol topgan bir qator futbolchilar mamlakatimizning turli jamoalarida ham to'p surishga ulgurishgan. Fikrimizga misol tariqasida muxlislarimizga tanish bo'lgan Akram Bahriddinov, Abdumalik Abdullaev, Timur Sultonov, Maksim Usmonov, shuningdek, futzalda faoliyat yuritayotgan Rustam Umarov, Umid Xolmatov, Xurshid Tojibaev kabi futbolchilarni keltirish mumkin. SHerzod Jo'raev esa futbolchilik faoliyati davomida oliy liga, xususan ”Navbahor” tarkibida to'p surib ishqibozlar mehrini qozonishga ulgurgandi. 
Bugungi mashg'ulotdan oldin klub rahbariyati va yoshlar jamoasi azolari o'rtasida kichik yig'ilish bo'lib o'tdi. Mazkur yig'ilishda yoshlarga mashg'ulotlarda astoydil harakat qilib, kelgusida nafaqat “Navbahor” jamoasi asosiy tarkibi balki terma jamoalarmiz uchun ham foydasi tegadigan futbolchi sifatida kamol topishlariga tilak bildirildi. SHuningdek, yig'ilish davomida Lyan hamda Jo'raevlar futbolchilarga yoshlar jamoasi murabbiylari sifatida rasman tanishtirildi.