“Navbahor” yig'iniga "Rubin"da o'ynagan hujumchi qo'shiladi

Mazkur legionerlarning safiga yana bir nafar xorijlik futbolchi qo'shiladigan bo'ldi.

Bu turkmanistonlik Voxit Orazsaxedov bo'lib, u 1992 yil 26 yanvarda tug'ilgan. Ampluasi – hujumchi. Orazsaxedov futbolchilik faoliyati davomida Rossiyaning “Rubin” (Qozon), “Nefteximik” (Nijnekamsk), “Rostov” (Rostov), Moldovaning “Dachiya” (Kishinyov), Turkiyaning “Osmonlispor” (Anqara), Ozarbayjonning “Sabail” (Boku), Turkmanistonning CSKA (Ashxobod), “Oltin asr” (Ashxobod) hamda “Axal” (Axal) klublarida to'p surgan.

O'tgan mavsumni esa Qirg'izistonning “Dordoy” (Bishkek) jamoasida o'tkazib, 28ta o'yinda 20ta gol urib, Qirg'iziston premer-ligasining eng yaxshi to'purari bo'ldi.

Takidlash joizki, Vaxit Orazsaxedov o'z paytida Turkmaniston yoshlar va olimpiya terma jamoalarida o'ynagan. 2016 yildan buyon Turkmaniston milliy terma jamoasida to'p surmoqda.

Eslatib o'tamiz, Vaxit Orazsaxedovdan tashqari, “lochinlar”ning yig'iniga yana bir turkmanistonlik futbolchi, himoyachi SHuhrat Suyunov ham qo'shiladi va u ham milliy terma jamoa azosi hisoblanadi.

Demak, takidlaganimizdek, “Navbahor”ning 10 yanvardan boshlanadigan o'quv-mashg'ulot yig'inida 30 nafarga yaqin mahalliy hamda 10 nafardan ortiq xorijlik futbolchilar ko'rikdan o'tishadi.

Legionerlar esa oldin xabar berganimizdek, Evropaning Rossiya, Niderlandiya, Xorvatiya, Bosniya va Gercogovina, Ispaniya, Portugaliya va Serbiya, Afrikaning Misr hamda Kamerun, Osiyoning Janubiy Koreya va Turkmaniston mamlakatlaridan tashrif buyurishadi.

Bu esa jamoaning murabbiylar shtabida tanlov imkoniyati ham yuqori bo'lishini anglatadi.

Mazkur futbolchilardan qaysi biri “Navbahor” murabbiylar shtabida ijobiy taassurot qoldirsa, o'sha o'yinchi bilan shartnoma imzolanadi.

Xorijlik futbolchilarning jamoa ixtiyoriga 10 yanvar kuni etib kelishlari kutilmoqda.


“Navbahor” matbuot xizmati