"Navbahor" Turkiyadagi yig'inni durang bilan yakunladi

Belek shahridagi “Suena” stadionida bo'lib o'tgan mazkur o'yinda durang – 1:1 hisobi qayd etildi.

Mazkur o'yinning 15-daqiqasida norvegiyaliklar  "Navbahor" darvozasiga to'p kiritib, 1:0 hisobida oldinga chiqib olishdi. Oradan 5 daqiqa o'tar-o'tmas, namanganliklar 11 metrli jarima zarbasi tepish huquqini qo'lga kiritishdi.

Penaltini esa Amirbek Jo'raboev aniq amalga oshirib, muvozanatni tikladi – 1:1.

Natijada tanaffusga har ikki jamoa azolari 1:1 hisobidagi durang natija bilan chiqib ketishdi.

Bahsning ikkinchi bo'limida garchi har ikki jamoada bir qator vaziyatlar yuzaga kelgan bo'lsa-da, futbolchilar undan samarali tarzda foydalana olishmadi.

Natijada 1:1 hisobi o'zgarishsiz qoldi.

Mazkur bahsda "Navbahor" ustozi Andrey Kanchelskis maydonga quyidagi futbolchilarni tushirdi: Dilshod Hamroev, Mirkomil Lokaev, Obid Jo'raboev, G'iyosjon Komilov, SHahzodbek Hamidov, Amirbek Jo'raboev, Sardor Telyakov, Abdulhay Ismoilov, Husayn Ergashboev, Zabihillo O'rinboev, Anvar Hojimirzaev.

Zaxiradan maydonga tushganlar: Islom Abdullaxonov, Komil Tojiddinov, Xurshid Muxtorov.   

Eslatib o'tamiz, Turkiyadagi yig'in davomida namanganliklar 8ta o'rtoqlik uchrashuvi o'tkazishdi.

Mazkur nazorat - sinov bahslarida “lochinlar” Turkmanistonning “Axal” klubini 1:0, Serbiyaning “Rad” jamoasini 2:1, Armanistonning “Uest” klubini 2:0 hisoblarida mag'lubiyatga uchratib, Ukrainaning “Kolos” jamoasi bilan 0:0, Qozog'istonning “Jetisu”, Gruziyaning “Samtredia” va  Norvegiyaning “Eydsvold” klublari bilan bo'lgan o'yinlarda 1:1 hisoblaridagi durangga imzo chekishdi.

"Navbahor" bo'lib o'tgan 8ta bahsning faqatgina bittasida - Gruziyaning “Dinamo” (Batumi) klubiga 0:1 hisobida imkoniyatni boy berdi.

O'z navbatida batumiliklar bilan bo'lgan bahsda “Navbahor”ning bir qator etakchi futbolchilariga dam berilgani, gruziyaliklar g'alaba to'pini penaltidan kiritganliklarini ham qayd etish joiz.

SHu tariqa, Andrey Kanchelskis shogirdlari Turkiyadagi o'quv-mashg'ulot yig'inini bugun yakunlashdi.

Namanganliklar ertaga yurtimizga qaytishadi.