"Navbahor": Pishur jamoamiz safida

"Navbahor"ning poytaxtdagi vaqtinchalik qarorgohiga ukrainalik hujumchi Oleksandr Pishur kelib qo'shildi. Bir kun oldin nazorat uchrashuvi o'tkazilganligi sababli, futbolchilarga dam olish elon qilinganligi sababli futbolchi "Navbahor" navbatdagi mashg'ulotlarida qatnashadi. Ushbu hujumchi yurtimiz muxlislariga Toshkentning “Bunyodkor” klubidagi ishtiroki bilan yaxshi tanish. Futbolchi 2013 va 2014 yilgi mavsumlarda aynan “qaldirg'ochlar” sharafini himoya qilgandi. 2015 yilgi mavsumni esa Pishur Qozog'istonda Jambulning “Taraz” jamoasi tarkibida o'tkazdi. O'tgan mavsum yakunlariga ko'ra “Taraz” Qozog'iston premer-ligasida uchinchi o'rinni qo'lga kiritgandi. Pishur esa 32 uchrashuvda maydonga tushib raqiblar darvozasini to'qqiz bor nishonga olgan. Jambulliklar bilan shartnomasi yakuniga etgach, Oleksandr Ukrainaga qaytgandi.

1981 yilning 26 yanvarida CHernigov shahrida tug'ilgan Pishur futbolchilik faoliyatini Belarusning “Dnepr-Transmash” klubida boshlagan. Keyinchalik hujumchi Ukrainaning “Metallist”, Vorskla”, “Zakarpate”, “Volin”, “Zarya”, “Tavriya”, “Obolon” hamda Slovakiyaning “Rujembero” klublari sharafini himoya qilgan. 2013 va 2014 yilgi mavsumlarda “Bunyodkor”da to'p surgan legioner O'zbekiston chempioni, mamlakat kubogi va superkubok sohibiga aylangan. Umumiy hisobda Pishur “qaldirg'ochlar” safida 69 o'yinda maydonga tushib, 35 ta golga mualliflik qilgandi. 2013 yilgi chempionat yakunida esa Oleksandr 19 gol bilan oliy liga to'purari nomini qo'lga kiritgan.