"Navbahor": O'smirlarimiz yarim finalga chiqishdi

Joriy yilgi musobaqada 11 ta jamoa to'rt guruhga bo'lingan holda bosh sovrin uchun kurashga kirishgandi. “Navbahor” futbol klubiga qarashli “Navbahor-Umid” futbol maktabi terma jamoasi ham turnirda ishtirok etmoqda. Yosh futbolchilarimiz bahslarga “V” guruhida kirishishgandi. Azam Rajabbaev murabbiyligidagi o'smirlarimiz dastlabki turda Jizzax viloyati jamoasini 4:2 hisobida mag'lubiyatga uchratishgandi. So'nggi turda Andijon bilan o'tgan uchrashuvda futbolchilarimiz 1:2 hisobida imkoniyatni boy berishdi. Andijon va Jizzax jamoalari o'zaro durang qayd etishgani bois o'smirlarimiz guruhda ikkinchi o'rinni band etgan holda chorak final yo'llanmasini qo'lga kiritishdi. 
CHorak finalda o'smirlarimizga Buxoro terma jamoasi futbolchilari raqiblik qilishdi. Murosasiz ruhda o'tgan uchrashuvda futbolchilarimiz 2:0 hisobida g'alaba qozonishdi. Jamoamizning har ikki goliga Abdulaziz Jalilov mualliflik qildi. Yarim final yo'llanmasini qo'lga kiritgan futbolchilarimiz navbatdagi uchrashuvda Toshkent shahri jamoasi yani “Paxtakor” futbol klubi tarbiyalanuvchilari bilan bahs olib borishadi. Yosh “paxtakor”chilar chorak finalda Toshkent viloyati terma jamoasini yirik 4:0 hisobida mag'lubiyatga uchratganligini qo'shimcha qilish joiz. Ikkinchi yarim final o'yinida esa Samarqand va Farg'ona viloyati vakillari o'zaro kuch sinashishadi.