"Navbahor": Dastlabki o'yin “Neftchi”ga qarshi

Kuni kecha 30 yanvarda start oladigan turnir taqvimi tasdiqlandi. Qura natijalariga ko'ra Lyan boshchiligidagi yoshlarimiz “A” guruhidan o'rin olishdi. Guruhda futbolchilarimizga “Neftchi”, “Qo'qon-1912-2”, Andijonning “UzDongJu” va Yozyavonning “Yozyavon-lochinlari” jamoalari raqiblik qilishadi. Dastlabki uchrashuv 30 yanvar kuni “Neftchi” klubiga qarshi bo'lib o'tadi. Yoshlarimiz 2-turda dam olishsa 3-turda “UzDongJu” (3 fevral) bilan bahs olib borishadi. 5 fevral kuni "Qo'qon-1912" jamoasining ikkinchi tarkibi bilan kuch sinashsak, 6 fevralga belgilangan oxirgi o'yin “Yozyovon-lochinlari”ga qarshi bo'lib o'tadi. Umuman olganda bu yilgi musobaqada vodiyning 10 ta jamoasi ikki guruhga bo'lingan holda bosh sovrin uchun bahs olib boradi. “V” guruhidan esa “Qo'qon-1912”, “Neftchi-2”, “Cementchi”, “Andijon-2” va “FarDu-Futbolinfo” jamoalari joy olishgan. Guruhlarda peshqadamlikni qo'lga kiritgan jamoalar 7 fevral kuni finalda kuch sinashishsa 2-o'rin sohiblari uchinchi o'rin uchun bahs olib borishadi. 
Bugun yoshlarimiz Andijonda birinchi liga vakili “UzDongJu” bilan navbatdagi nazorat o'yinida kuch sinashishdi. Keskin va murosasiz ruhda o'tgan o'yinda maydon egalarining yagona kiritgan goli andijonliklarning g'alabasini taminladi. Yodingizda bo'lsa “UzDongJu” bir hafta oldin Namanganda mehmon bo'lib, Lyan shogirdlari bilan 1:1 hisobida durang qayd etgandi. Yoshlarimiz “UzDongJu” bilan yana bir bor kuch sinashish imkoniga ega bo'lishadi. Bu safargi qarama-qarshilik “Hokim kubogi” turnirida bo'lib o'tadi.