"Nasaf" sardori Umar Eshmurodov: "Dushanbedagi suniy qoplamali maydonga ancha moslashib oldik"

FOTO  OFK kubogi. "Nasaf"ning Dushanbedagi bugungi mashg'ulotidan maxsus GALEREYA

Qarshining "Nasaf" jamoasi joy olgan "F" guruhi o'yinlari Tojikiston poytaxti Dushanbe shahrida bo'lib o'tadi. "Ajdarlar" 10 may sanasidan beri musobaqa o'tadigan joyga etib kelishgan va mashg'ulotlarni olib borishmoqda. "Championat.asia" sayti xodimi Tolibjon Qosimov ana shu jarayonlarni bevosita voqea joyidan yoritib borish maqsadida Tojikistonga etib kelgan. Jamoaning bugungi mashg'ulotidan so'ng muxbirimiz qarshiliklar sardori Umar Eshmurodovdan qisqa intervyu oldi.

- "Nasaf" uchinchi kundirki Dushanbeda mashg'ulotlarni olib bormoqda. Tayyorgarlik jarayoni qanday davom etmoqda?

- O'yinlarimiz suniy qoplamali stadionda bo'lgani sabab mashg'ulotlarni ham aynan suniy maydonda olib boryapmiz. Bu maydonga ancha moslashib oldik, yaxshi. Juda qattiq emas, yumshoq. Boshqa suniy qoplamali maydonlarga qaraganda yaxshiroq. O'zimizni CHig'atoydagi maydondan ham yumshoqroq ekan.

- Uch kunlik mashg'ulotlardan keyin o'yinchilarda qandaydir og'riqlar yo'qmi?

- Og'riqlar bor. Lekin, har kuni mashg'ulot olib boraverganingizdan keyin oyoqlar va bel og'riqlarga ancha ko'nikib qoladi. Sekin-sekin og'riqlar kamayadi va umuman yo'qoladi. Aynan shu sabab o'yingacha moslashib olish maqsadida Dushanbega ertaroq keldik. Maqsad - mana shunday og'riqlar o'yin payti bo'lmasligi uchun va shunday yo'l tutilgani yaxshi bo'ldi.

- Sardor sifatida jamoada o'yinchilarning kayfiyati qanday ekanligini ayta olasizmi?

- Kayfiyat yaxshi, hamma o'yinga munosib tayyorgarlik ko'rdi. Alloh nasib qilsa yaxshi natijalar qayd etib guruhdan chiqishimiz kerak. Faqat g'alaba uchun harakat qilamiz, tayyorgarlik ham shunga yarasha. Hamma sog'-salomat va o'yinga shay.

Tolibjon Qosimov

Dushanbe, Tojikiston

VIDEO  OFK kubogi-2021. "Nasaf"ning bugungi mashg'uloti va Umar Eshmurodov bilan intervyu