"Nasaf": Yig'indagi ilk raqibmiz - “Ilichevec”

Jamoa azolari 22 yanvar sanasida Antaliyaga etib kelgan bo'lsa, jamoa sardori va etakchisi Artur Gevorkyan oradan bir kun o'tib safga qo'shildi. SHuningdek, milliy terma jamoa safida Osiyo kubogida ishtirok etgan uch nafar futbolchimiz – Eldorbek Suyunov, SHuhrat Muhammadiev va Farruh Sayfievlar 24 yanvar kuni jamoa ixtiyoriga etib kelishdi. SHu bois murabbiylar shtabi ularga ikki kunlik tatil berishdi.

Rejaga ko'ra, “Nasaf” futbolchilari 25 yanvar sanasida Ozarboyjonning “Gabala” jamoasi bilan nazorat uchrashuvini o'tkazishlari lozim edi. Ammo kecha Antaliyada kuchli yomg'ir yog'ib o'tganligi bois, ushbu o'yin bekor qilindi va futbolchilarimiz mashg'ulotlar bilan cheklanishdi. Darvoqe, kechagi mashg'ulotlarni jamoamiz OFK tomonidan Osiyo chempionlar ligasida ishtirok etadigan jamoalar uchun beriladigan maxsus to'plarda o'tkazishdi.

Bugun “Nasaf” ilk nazorat uchrashuvini Ukrainaning “Ilichevec” jamoasi bilan o'tkazadi. Mariupol shahri sharafini himoya qilayotgan jamoa ayni paytda Ukraina premer ligasida so'nggi pog'onada bormoqda. Ushbu jamoa azolari Antaliyada futbolchilarimiz bilan bitta mehmonxonada istiqomat qilishmoqda. “Nasaf” ikki yil ilgari aynan Antaliyadagi yig'in davomida ham ushbu jamoa bilan kuch sinashgan va o'shanda tomonlar golsiz durangga imzo chekishgandi. Yangi mavsumda jamoamiz sharafini himoya qiladigan ukrainalik legioner Oleksandr Kablash  2007-2008 yilgi mavsumda Ukraina birinchi ligasida mariupolliklar sharafini himoya qilgan.

Ertangi uchrashuv mahalliy vaqt bilan 15:30 (Toshkent vaqti bilan 18:30)da boshlanadi. O'yin jamoamiz istiqomat qilayotgan mehmonxonaga qarashli futbol maydonida o'tkaziladi.