“Nasaf” futbol klubi muxlislari Buxoroga borishadi

Amaldagi O'zbekiston Kubogi va Superkubogi sohibi bo'lgan “Nasaf” jamoamiz, o'z tarixidagi oltinchi marta kubok finali yo'llanmasi uchun “Buxoro” jamoasi bilan bahs yuritadi.

Ushbu muhim uchrashuvda o'z sevikliklari - “Nasaf” jamoamizni bevosita stadionda qo'llab-quvvatlash uchun ko'psonli muxlislarimiz bugun Buxoro shahriga tashrif buyurishadi.

O'ktam Uzoqov boshchiligidagi muxlislar klubi faollari mana bir necha kundirki, mazkur uchrashuvga tayyorgarlik ko'rishdi.
Bugun ular Buxoro shahridagi “Buxoro” sport majmuasida bo'ladigan “Buxoro” – “Nasaf” uchrashuvida faol muxlislik qilish maqsadida yo'lga chiqishmoqda.

Keling, “Nasaf”ning barcha muxlislari nomidan jamoamizga zafar tilab qolamiz. Olg'a “ajdarlar”!