Muxtor Qurbonov: Tayyorgarlikdan ko'nglim to'lmoqda

Bugungi kunda murabbiylikda foliyat yuritayotgan Qurbonov ayni paytda birinchi liga ishtirokchisi "NBU-Osiyo"ni boshqarmoqda. Aytish kerakki, uning jamoasi bu yil ko'pchilikda iliq taassurot qoldirmoqda. Ikkinchi bosqich o'yinlariga bankirlarning tayyorgarligi qanday ketayotganini bilish maqsadida Muxtor Qurbonov bilan qisqacha suhbat qildik.

- Muxtor aka, jamoangizning ikkinchi bosqich uchun ko'rayotgan tayyogarligidan ko'nglingiz to'lmoqdami?
- Ha, sharoitimizdan kelib chiqib, mavsumning qolgan qismiga puxta tayyorgarlik ko'rishga harakat qilyapmiz. Mashg'ulotlar avvaliga kuniga ikki mahaldan o'tkazildi. Bazida bir mahaldan shug'ullandik. Yig'inni o'z qarorgohimizda o'tkazdik.

- SHuningdek boshqaruvingizdagi jamoaning o'rtoqlik uchrashuvlarida ham ishtirok etganidan xabarimiz bor.
- Ha, mashg'ulotlar bilan birga bazida sinov-nazorat o'yinlariga ham etibor qaratdik. CHunki hozir tarkibimizda ko'rikdan o'tish kelgan bir nechta futbolchilar bor. Ularni aynan nazorat o'yinlari orqali imkoniyatlarini tekshirib bormoqdamiz. SHu kungacha So'g'diyona, Qo'qon-1912 va SHo'rtan kabi jamoalar sparring-raqibimiz bo'ldi. Bugun esa Xorazm bilan yana bir o'rtoqlik o'yinini o'tkazamiz. Bu o'yin o'z maydonimizda kechadi.

- Ko'rikdan o'tish kelgan futbolchilarning qaysilari bilan kelishuvga erishdinglar?
- Hozircha hech bir futbolchini qolishi aniq emas. Bugungi o'yin ko'pchilikni taqdiriga oydinlik kiritadi. Farrux Nurliboev, Javlon Guseynov, Farhod Usmonov va bir qator yangi yosh futbolchilar ko'rikda bo'lib turishibdi.

- Jamoa bilan xayrlashgan futbolchilar ham bormi?
- Birinchi bosqichda to'purarlik mahoratini namoyish etgan iqtidorli hujumchimiz Husniddin G'ofurov Serbiyaning "Yavor" klubiga ko'chib o'tganidan xabaringiz bor. Undan tashqari gruziyalik legionerimiz Tariel Enukidze ham jamoadan ketdi. Bu futbolchi vataniga qaytib ketgan.


Islombek Rustambekov suhbatlashdi