Murod Ismoilov: "Rahbariyatdan istefo so'rayman"

"Bazi g'iybatchi, g'alamis muxlislardan tashqari qolgan barcha muxlislarimizdan uzr so'rayman. Sababi shonli tarixga ega bo'lgan "Neftchi" bunday o'yin ko'rsatishi kerak emas. Ushbu mag'lubiyat uchun rahbariyatdan ham uzr so'rayman. Mag'lubiyatda bosh aybdor bosh murabbiy bo'ladi", - deb gap boshladi Murod Ismoilov.

"SHerzod Hakimov, Sardor Mirzaev jarohat tufayli uch haftaga safdan chiqishgan. Abdulloh Olimov, Sardor Rahmonov va Javohir Rasulov terma jamoaga chaqiruv olishgan. Aynan shu o'yinchilar bizga etishmadi. Lekin bu bahona emas, ularsiz ham bunday yomon o'ynamasligimiz kerak edi".

"Neftchi"ga kelib pulni tagida qolib ketganim yo'q. PRO licenziyasiga o'qish uchun barcha pullarni o'zim to'layapman".

"Rahbariyatdan bosh murabbiylik vazifasini boshqa insonga topshirishlarini iltimos qilardim. Muxlislarning ham sabri bor. Menga esa yoshlar jamoasi yoki yordamchi murabbiylik lavozimi berilsa bepul ishlashga ham tayyorman. Yoki butunlay jamoadan ketishim ham mumkin".

"Bunyodkor"ga qarshi o'yinda yigitlarda shijoat ko'rindiyu boshqa o'yinlarda bu narsa ko'rinmayapti? Bunga qo'shilmayman, har bir o'yindan oldin men yigitlarning ko'zida shijoat ko'rayapman. Balki men murabbiylikni eplay olmayotgandirman. Balki Andrey Fyodorov yoki Tohir Kapadzeni o'zi murabbiy bo'lar. Men oriyat tufayli bosh murabbiy lavozimidan ketmoqchiman. SHunday qilsak balki jamoa yaxshi natijalarga erishar. Agar men ketsam va barcha narsa yaxshilanib ketsa men bundan xursand bo'laman".

 
Komiljon Ikromov yozib oldi