Murod Ismoilov: "Lokomotiv" bilan safarda durang biz uchun yaxshi natija"

"Avvalo barchani Navro'z ayyomi bilan tabriklayman. O'yin xususida gapiradigan bo'lsak, bugun biz juda kuchli futbolchilarga ega bo'lgan jamoa qarshi o'ynadik. "Neftchi" bugun o'z kuchidan kelib chiqib, himoyaviy o'yin taktikasini tanladi. Ko'pchilikka o'yinimiz balki uncha yoqmagandir. Lekin vaziyatdan kelib chiqqan holda o'ynadik. Bir tomondan olib qaraganda, bu bahsda omadimiz ham chopdi. Bugun g'alaba qozonishimiz ham mumkin edi yoki mag'lubiyatga uchrashimiz ham mumkin edi. Lekin "Lokomotiv" bir qator vaziyatlardan unumli foydalana olishmadi. Endi bu narsalar u jamoaning muammosi. Asosiysi biz Toshkentdan ochko oldik", -  deya gap boshladi Murod Ismoilov.

- "Neftchi" dastalbki ikki turda ikki ochko jamg'ardi. Bu siz uchun qoniqarli natijami?
- Bugun biz "Lokomotiv" bilan safarda o'ynadik va durang yomon natija emas. Lekin birinchi turdagi natija biz uchun qoniqarli bo'lmadi. "SHo'rtan" bilan o'yinda g'alaba qozonishimiz kerak edi. Bir qator futbolchilarimiz olimpiya terma jamoasiga jalb etilgan. Lekin biz "Paxtakor"ga o'xshab o'yinni qoldirishni so'ramadik. Lekin bu bilan ularning qarorini yomonlamoqchi emasman. Sababi ularning asosiy tarkib futbolchilari termaga chaqiruv olishdi. Bizda esa barcha o'yinchilar ham asosiy tarkib azolari hisoblanmaydi.

- Otabek Haydarov bugun hujum chizig'ida o'ynamadi va Akmal Holmatovni zaxiradan maydonga tushirishingizni sababi nimada ekanligini aytib bersangiz?
- Otabek Haydarov bugun vaziyatdan kelib chiqib hujumda o'ynamadi. Akmalga keladigan bo'lsak, mana bilamizki "Manchester Yunayted"da Giggz va Skoulz kabi futbolchilar o'ynashgan. Ular nafaqat asosiy tarkibda maydonga tushib jamoaga yordam berishgan, balki kiyinish xonasi ham etakchilik qilib, ajoyib muhitni yaratishda va futbolchilarni tajribasini oshirishda katta ko'maklari tekkan. Akmaldan biz kerakli paytda foydalanamiz. Uning hozirgi kundagi jismoniy holati 90 daqiqa o'ynashga yo'l qo'ymaydi. Holmatov nafaqat maydonda, balki maydondan tashqarisida ham bizga katta yordam bermoqda.

- Murod Bobojonovning jarohati jiddiymi?
- Murod Bobojonovni nega asosiy tarkibda tushirmayapsizlar degan savollar juda ko'p yangramoqda. Murodbekning jarohati borligi bois biz uni asosiy tarkibda qo'ymayotgan edik. Mana bugun ham ikkinchi oyog'ini shikastlab oldi. Lekin o'ylashimcha, u tez orada yana maydonga qaytadi.

- Keyingi o'yin yangi stadionda bo'ladimi yoki yana Qirgulidami?
- Xudo xohlasa "Navbahor" bilan bo'ladigan bahs yangi stadionda bo'lib o'tadi. Yangi stadion Navro'z bayramiga ochib topshirildi va endilikda o'yinlarimizni ushbu stadionda o'tkazamiz.


SHahboz Beg'amov