Мурод Исмоилов: "Локомотив" билан сафарда дуранг биз учун яхши натижа"

"Аввало барчани Наврўз айёми билан табриклайман. Ўйин хусусида гапирадиган бўлсак, бугун биз жуда кучли футболчиларга эга бўлган жамоа қарши ўйнадик. "Нефтчи" бугун ўз кучидан келиб чиқиб, ҳимоявий ўйин тактикасини танлади. Кўпчиликка ўйинимиз балки унча ёқмагандир. Лекин вазиятдан келиб чиққан ҳолда ўйнадик. Бир томондан олиб қараганда, бу баҳсда омадимиз ҳам чопди. Бугун ғалаба қозонишимиз ҳам мумкин эди ёки мағлубиятга учрашимиз ҳам мумкин эди. Лекин "Локомотив" бир қатор вазиятлардан унумли фойдалана олишмади. Энди бу нарсалар у жамоанинг муаммоси. Асосийси биз Тошкентдан очко олдик", -  дея гап бошлади Мурод Исмоилов.

- "Нефтчи" дасталбки икки турда икки очко жамғарди. Бу сиз учун қониқарли натижами?
- Бугун биз "Локомотив" билан сафарда ўйнадик ва дуранг ёмон натижа эмас. Лекин биринчи турдаги натижа биз учун қониқарли бўлмади. "Шўртан" билан ўйинда ғалаба қозонишимиз керак эди. Бир қатор футболчиларимиз олимпия терма жамоасига жалб этилган. Лекин биз "Пахтакор"га ўхшаб ўйинни қолдиришни сўрамадик. Лекин бу билан уларнинг қарорини ёмонламоқчи эмасман. Сабаби уларнинг асосий таркиб футболчилари термага чақирув олишди. Бизда эса барча ўйинчилар ҳам асосий таркиб аъзолари ҳисобланмайди.

- Отабек Ҳайдаров бугун ҳужум чизиғида ўйнамади ва Акмал Ҳолматовни захирадан майдонга туширишингизни сабаби нимада эканлигини айтиб берсангиз?
- Отабек Ҳайдаров бугун вазиятдан келиб чиқиб ҳужумда ўйнамади. Акмалга келадиган бўлсак, мана биламизки "Манчестер Юнайтед"да Гиггз ва Скоулз каби футболчилар ўйнашган. Улар нафақат асосий таркибда майдонга тушиб жамоага ёрдам беришган, балки кийиниш хонаси ҳам етакчилик қилиб, ажойиб муҳитни яратишда ва футболчиларни тажрибасини оширишда катта кўмаклари теккан. Акмалдан биз керакли пайтда фойдаланамиз. Унинг ҳозирги кундаги жисмоний ҳолати 90 дақиқа ўйнашга йўл қўймайди. Ҳолматов нафақат майдонда, балки майдондан ташқарисида ҳам бизга катта ёрдам бермоқда.

- Мурод Бобожоновнинг жароҳати жиддийми?
- Мурод Бобожоновни нега асосий таркибда туширмаяпсизлар деган саволлар жуда кўп янграмоқда. Муродбекнинг жароҳати борлиги боис биз уни асосий таркибда қўймаётган эдик. Мана бугун ҳам иккинчи оёғини шикастлаб олди. Лекин ўйлашимча, у тез орада яна майдонга қайтади.

- Кейинги ўйин янги стадионда бўладими ёки яна Қиргулидами?
- Худо хоҳласа "Навбаҳор" билан бўладиган баҳс янги стадионда бўлиб ўтади. Янги стадион Наврўз байрамига очиб топширилди ва эндиликда ўйинларимизни ушбу стадионда ўтказамиз.


Шаҳбоз Беғамов