Murod Ismoilov: "2:0dan ko'ra 0:1 yaxshiroq"

"Neftchi" jamoasi nomidan butun Respublikamizni bugungi bayram bilan tabriklab qolaman. SHunday kunda stadionga kelgan muxlislarga g'alabani taqdim etdik. "Dinamo"ning oxirgi 4ta o'yinini kuzatdik. Ular juda ham tartibli o'ynashadi. Tachmurod Agamurodov kuchli va tajribali murabbiy hisoblanadi. Ayrim vaziyatlarda istagan narsalarimizni amalga oshira olmadik. Bugun jarohatlari bois Abdulloh Olimov va Baxtiyor Yoqubov maydonga tusha olishmadi", - deydi Ismoilov.

- Keyingi turlarda "Neftchi" "Paxtakor" va "Nasaf"ga qarshi bahslar kutib turibdi. SHu bois "Dinamo" bilan uchrashuvda yigitlar u qadar katta kuch ketkazishmadimi?
- Yo'q, bunday demagan bo'lardim. Sababi o'yinlar orasida kamida bir hafta muddat bor. SHunchaki bugun yigitlar aytganimdek bazi holatlarni amalga oshira olishmadi. Bu ishtiyoqsizlik yoki o'zini asrash uchun qilishdi deya olmayman.

- Yozgi transfer bozori vaqtida tarkibga yana kuchli futbolchilar kelishi mumkinmi?
- To'g'ri mavsum uzoq, shu bois tarkib kuchaytirilishi mumkin. Lekin barchasi ichki holatimizdan kelib chiqib amalga oshiriladi. Har bir chiziqqa ikki nafardan futbolchi bo'lsa yaxshi bo'lardi.

- Akmal Xolmatov bugungi o'yindan so'ng intervyu oldik. 2:0dan so'ng nima uchun o'yin sustlashdi deganimda g'alabaga sal ertaroq ishonib qoldik dedi. Uning fikriga qo'shilasizmi?
- Yaxshiyamki uchinchi golni urdik. Men eng yomon ko'rgan hisob 2:0 hisobida oldinda borishimiz, undan ko'ra 0:1 hisobida yutqazib turgan yaxshi. Sababi ikki to'p bilan oldinda borsangiz futbolchilar tezda bo'shashib ketishadi. Bu hisobni ushlab qolish uchun professional bo'lish kerak.

- "Paxtakor" va "Nasaf"ga qarshi o'yinlarga o'zgacha tayyorgarlik bo'ladimi?
- Yo'q. Barcha jamoaga qarshi bir xil tayyorlanamiz. SHunchaki raqibning o'yin uslubini o'rganib chiqamiz va shunga yarasha tayyorlanamiz. Taktik, texnik tomonlama. Yigitlar ko'rsatmalarimizni to'g'ri bajarishsa g'alaba qozonamiz.