Muhsin Nizomiddinov: "Hech kimdan kam joyimiz yo'q"

O'yin haqida

- Yaxshi o'yin bo'ldi. Ikki tomon ham g'alaba uchun harakat qildi. Natija "Mashal" tomonida bo'ldi.

- Siz bugungi o'yin qaydnomasida texnik direktor sifatida ko'rsatildingiz. Jamoada bosh murabbiy yo'qmi?

- Bosh murabbiy borasida anchayin izlandik. Rahbariyatning so'ngi qarori bilan bosh murabbiylik vazifasi menga ishonib topshirildi. Maqsad sari intilishda harakat qilamiz. 

- Bugun "Mashal" bir kishi kam bo'lib jamoangizni mag'lub etdi. Guruhdagi vaziyatni qanday baholaysiz?

- Men murabbiy sifatida jamoadan har bir o'yinda g'alaba hohlayman. Bu borada ishlayapmiz. Ko'rdinglar, oz bo'lsada, shuncha yo'l bosib, Qo'qondan kelib, bizga muxlislik qilishayapti. Har doim ular uchun harakat qilishimiz kerak. "Surxon" bilan o'yinga ham faqat g'alaba uchun maydonga chiqamiz. Biz uchun raqibning ahamiyati yo'q. Masalan, "Nasaf" bilan ham yigitlar yomon harakat qilishmadi.

- Jamoa oldidagi maqsad qanday?

- Bugun yutqazganimiz jamoa oldida maqsad yo'qligini anglatmaydi. "Qo'qon-1912"ni Superligaga qaytarish uchun ishlayapmiz. Bugun ko'p futbolchilarni ko'rib oldim. Yosh yoki tajribali futbolchi, biz hammaning imkoniyatlarini chamalab olishimiz kerak. Kimdir o'ynamayapti, keyin o'ynab ketadi. Maqsadimiz yuqori, shu vazifa yo'lida intilamiz. Hech kimdan kam joyimiz yo'q.