MTJ. Toshkentdagi oxirgi mashg'ulotga Kapadze qo'shildi

Kechki payt mashg'ulot odatdagidek soat 16:00da boshlandi va bir yarim soat davom etdi. Yangilik shuki, bugundan mashg'ulotga Temur Kapadze ham qo'shildi. Bilasiz, yarim himoyachi joriy mavsumni Qozog'iston chempionatida o'tkazdi va hozirda erkin agent hisoblanadi.

Terma jamoa mashg'uloti har doimgidek chigalyozdi mashqlari bilan boshlandi, bunda Aleksandr Volkov futbolchilar bilan ishladi. Navbat to'p bilan ishlashga kelganda mashg'ulotning asosiy qismini bosh murabbiy Mirjalol Qosimov hamda yordamchilari SHuhrat Maqsudov va Baxtiyor Ashurmatov o'tkazishdi.

Kechagi mashg'ulotda biroz jarohat olgani uchun Egor Krimec bugun ham alohida shug'ullandi. U asosan maydon bo'ylab yugurish orqali tiklanish mashqini bajardi. Mashg'ulotning ikkinchi qismida o'yinchilar ikki jamoaga bo'linib futbol o'ynashdi. Unda darvozabonlar navbati bilan darvozalarni qo'riqlashdi.

Endi futbolchilarga ikki kun dam beriladi va 1 dekabr kuni terma jamoamiz yig'inni davom ettirish maqsalida Dubayga uchib ketadi. Dubaydagi ilk yig'in 14 dekabrga qadar davom etadi.