Mo'min Meliev: "Mashal" Pro ligaga tushib ketganiga achindim"

Baxtiyor Ashurmatov boshchiligidagi "Qo'qon-1912"ga yo'l olgan futbolchi ilk davrada yaxshi taassurot qoldirdi. Bir qator gollarga mualliflik qildi. Biroq jarohatlar o'zini ko'rsatishiga pand berdi. Xo'sh, mavsum bo'yicha olgan taasurotlari qanday bo'ldi? Quyida Mo'min Meliev bilan tashkil qilingan suhbatni o'qishingiz mumkin.

- 2021 yil boshida Qo'qonga ko'chib o'tdingiz. Yangi sarguzashtlar qanday kechdi? Boshqa jamoadagi ilk mavsum taasurotlari haqida...

- Albatta, "Qo'qon-1912"ga ko'chib o'tdim. Undan avval "Mashal" jamoasida ajoyiyu 4 yilni o'tkazdim. Klubdan juda yaxshi xotiralar qolgan. 2019 yil Pro ligada g'olib chiqdik, Superligaga yo'llanma oldik. 

- Gohida shunday futbolchilar borki, yangi jamoasida sermahsullik ko'rsatishi uchun bir necha oy moslashish talab qilinadi. Siz esa ilk turdanoq gol urishni boshlab yubordingiz...

- Moslashishda jamoadagi futbolchilar va murabbiylar katta rol o'ynadi. Qo'qonda ahil jamoa bor. Ichki muhit yaxshi. Barcha bir-birini qo'llab-quvvatlashga tayyor. Ko'z tegmasini hammasi ko'ngildagidek bo'ldi. Jarohat olmaganimda yanada o'zimni ko'rsata olardim. 

- Safarda "Mashal"ga urgan golingiz ko'p muhokamalarni keltirib chiqardi. O'shandan keyingi holatingiz qanday ko'rinish oldi? Qamrab olgan hissiyotlar borasida nima deya olasiz?

- Oldimdagi insonlar nima bo'lganini bilishadi. Har xil salbiy va nafsoniyatga tegadigan gaplarga duch keldim. Nima ham derdim, taqdirimda shu yozilgan ekan. Bundan norozi emasman. 

- Qo'qonda Baxtiyor Ashurmatov hujumkor, jangovar va agressiv jamoa tuza oldi. "Mashal"da esa mana shu narsani ko'rmadik. Mana shu ikki jihatni solishtira olasizmi ?

- Murabbiylarni taqoslash noo'rin, deb bilaman. Har bir murabbiy o'yinga o'zgacha yondoshadi. Uslubi va taktikasida farq bor. Menimcha ortiqcha izohga xojat yo'q. 

- 2019 yil "Mashal" Pro ligada birinchi o'rinni egallab Superligaga chiqqandi. O'sha jamoa tarkibida to'p tepgansiz. Endilikda jamoa yana Pro ligaga ravona bo'ldi. Ushbu jarayon sizni befarq qoldirmadimi?

- Sobiq jamoaga befarq emasman. U erda juda yaxshi futbolchilar yig'ilgan. Barchasi aka-uka va do'stlarim. To'g'risi ularga achindim. Hammadan ham o'rinbosarlar jamoasiga qiyin bo'ladi. CHunki Pro ligada U-21 jamoasi ishtirok eta olmaydi. Lekin bir tomondan "Olimpik" uchun xursandman. Ikki jamoaga ham omad tilayman. 

- Mavsum yakunlandi. Navbatdagi rejalar haqida o'ylashni vaqti kelmadimikin?

- Xudoga shukur oldimda 2-3 ta variantlarim bor. Barchasi bayramdan keyin hal bo'ladi.

Abdulaziz Iskandarov