Mirjalol Qosimov: "Jarohat olganlar yo'q va hamma o'yinga tayyor"

Ayni paytda Sidneyda bo'lib turgan O'zbekiston milliy terma jamoasi Osiyo chempionatidan o'rin olgan guruhdagi ilk bellashuvni 10 yanvar kuni KXDR (SHimoliy Koreya) termasiga qarshi o'tkazadi. Terma jamoamiz blugun mahalliy vaqt bilan soat 18:00dan 20:00ga qadar mashg'ulot o'tkazdi. Mashg'ulot yakuniga etgach, bosh murabbiy Mirjalol Qosimovdan intervyu oldik.

- Osiyo Kubogidagi ilk uchrashuvimizga nihoyatda kam vaqt qoldi. Musobaqa oldidan hissiyot kuchlimi?
- Albatta, bunday katta musobaqada ishtirok etishning o'ziyoq kuchli hayajonni keltirib chiqaradi. Busiz iloji yo'q. Hammamiz yaxshi niyat qilib turibmiz, nasib qilsa, musobaqani g'alaba bilan boshlamoqchimiz. Ilk o'yinda g'alaba qozonish biz uchun nihoyatda muhim.

- Futbolchilar KXDR bilan bo'ladigan bahsga tayyormi? Tarkibda jarohat olganlar yo'qmi?
- Bilasiz, Odil Ahmedovda jarohat bor edi, shuningdek Server Jeparovni ham jarohat biroz bezovta qilayotgandi. Xudoga shukur, hozir hammasi ortda qoldi va bu ikki futbolchimiz o'yinga shay. Ko'z tegmasin, safimizda jarohat olganlar yo'q.

- Avstraliya - umuman boshqa qita. SHundan kelib chiqib jamoa mahalliy iqlim va muhitga to'liq moslasha oldimi?
- Moslashish oson bo'lmagani bor gap. CHunki bu erdagi vaqt Toshkentdagidan olti soat farq qiladi. SHu bois bu erga kelgan dastlabki kunlarda moslashib olish nisbatan qiyin kechdi. Ammo hozirgi kunga kelib barchasi ortda qoldi.

- Birinchi turdagi raqibimiz SHimoliy Koreya etarli darajada o'rganildimi? Ular xuddi sirli jamoadek ko'rinmoqda.
- Haqiqatdan ham bu raqibni sirli jamoa desa bo'ladi. Negaki ular haqida malumot topish oson emas. Ammo biz ilojini qilib, koreyaliklar ishtirokidagi o'yinlarni ko'rdik. Ular doim bir xil 4-4-2 sxemasida to'p tepishadi.

- Ushbu uchrashuvga qanday taktik usulni qo'llamoqchisiz?
- Biz uchun birinchi bo'lib gol urish juda muhim hisoblanadi. Sababi SHimoliy Koreya shunday jamoaki, birinchi bo'lib o'z darvozasidan to'p o'tkazib yuborsa, o'yin tizginini qo'ldan chiqarib yuborishi mumkin. Bu esa bizga qo'shimcha imkoniyat yaratadi.

- Sidneydagi ilk uchrashuv O'zbekiston ishtirokida bo'ladi. Musobaqa finali ham shu stadionda bo'lib o'tishini inobatga olsak, terma jamoamizning oxirgi bahsni ham shu erda o'tkazish rejasi bo'lsa kerak?
- Albatta, futbolda oldindan bir narsa deyish qiyin. Lekin sportda ilojsiz narsaning o'zi yo'q. SHunday ekan, finalgacha borishga astoydil harakat qilamiz.

- Malayziya klubiga qarshi o'rtoqlik uchrashuvi qanday ahamiyatga ega bo'ldi?
- Bu o'yin biz uchun juda zarur edi. Negaki mahalliy iqlimga tezroq moslashib olish uchun ham birorta o'yin o'tkazmasak bo'lmasdi. Yigitlar yaxshi harakat qilishdi. Endi bor etiborni rasmiy bahslarga qaratamiz.

X.Xoliqov, N.Yuldashev,
Sidney, Avstraliya.