Mirjalol Qosimov: "Janubiy Koreyadan qabul qilingan mag'lubiyat hamon yodimizda"

Qosimovga matbuot anjumanida o'yinning eng yaxshi futbochlisi deb topilgan Sardor Rashidov hamrohlik qildik.

"Assalomu alaykum. Albatta, judayam og'ir shiddatli, qiziqarli o'yin bo'ldi. Sababi ikkala jamoa ham g'alaba uchun o'ynadi. Saudiya Arabistoni safida kuchli futbolchilar yig'ilgan. SHunga qaramay yigitlar maydonga tushib g'alaba qozonishdi. SHu fursatdan foydalanib xalqimizga, Avstraliyaga kelib bizni qo'llab turgan muxlislarga va jurnalistlarga katta rahmat aytmoqchiman", - deydi Qosimov.

"Bugun juda ham yaxshi o'yin bo'ldi. Raqibimiz ham yaxshi o'ynadi. Saudiya Arabistoniga qarshi bahsda ikkita gol urdim, juda ham xursanmdan. Barcha muxlislarga rahmat aytmoqchiman", - deydi Sardor Rashidov.

- Sizningcha murabbiylik faoliyatingizdagi eng chiroyli g'alaba bo'ldimi?

- Haqiqatdan ham bugungi o'yin og'ir kechdi. Qisqa vaqt ichida yigitlarni ruhan tayyorlash kerak edi. Bugun maydonga tushgan futbolchilar, zaxiradagi futbolchilar ham yurakdan g'alaba uchun kurashishdi. Har bir qarich er uchun kurashishdi, bu qilingan mehnatlarining samarasi bo'ldi. Agar har bir o'yinda shunday harakat qilishsa chiroyli g'alabalar bo'laveradi. Futbolchilarga g'alaba uchun rahmat aytaman. Ular xalqimizga kutilgan g'alabani taqdim etishdi. 

- Sardor bugungi birinchi golda kimning xissasi katta bo'ldi deb o'ylaysiz: siznimi yoki raqib posboninimi?

Sardor Rashidov: - Birinchi golimga kelsak butun jamoamizning xissasi. Gollarda duo qilib turgan xalqimizning xissasi bo'ldi. Bu vaziyatda omad ham menga kulib boqdi.

- Bugun bir qator tajribali futbolchilarni zaxirada qoldirishga jazm etdingiz. Yoshlar bilan g'alaba qozonishga qanday erishdingiz?

- Futbol shunday sport turiki unda hech nimani oldindan ayta olmaysiz. Tarkibga yoshlarni kiritdim, bu narsa o'zini oqlaganidan xursandman. Maqsadimiz o'tgan turdayoq g'alaba qozonib, uchinchi turda yoshlarga imkon berish edi. Jeparov hamon terma jamoamizning muhim o'yinchisi, uning termaga hali ko'p foydasi tegadi. 

- Bugun darvozangizga belgilangan penalti haqida nima deya olasiz? 

- Hozir penalti haqli yoki nohaq bo'ldi deb aniq ayta olmayman, videoni ko'rib chiqib aytishim mumkin. Lekin o'sha o'yinchi bir necha marta yiqilib penalti ishlashga uringandi. Simulyaciya uchun hakam sariq kartochka ko'rsatishi kerak edi.

- CHorak finalda raqib Janubiy Koreya bo'ladi. Ushbu jamoa JCH-2014 saralashi yo'lida bizga to'siq bo'lgandi. Futbolchilar va murabbiylar aynan mana shu raqibni mag'lub etib xalqimizni xursand qilish niyati bormi?

- Albatta, barchamiz o'sha holatni yaxshi eslaymiz. Futbolchilarning o'zlarida ham Janubiy Koreyani mag'lub etish maqsadi bor. Nasib qilsa chorak finalda ushbu raqib to'sig'idan ham o'ta olamiz.

- O'zbekiston terma jamoasi futbolchilari bilan qaysi tilda gaplashasizlar: ruschami yoki o'zbekcha? Melburn shahri haqida nima deya olasiz?

- Tarkibimizda rus tilini biladigan ko'plab futbolchilar bor. Denisov, Jeparov, Kapadze, Krimec... Davlat tili o'zbek tili hisoblanadi. Lekin bazi joylarda rus tilini ham qo'llab turamiz. Bu normal holat deb o'ylayman. SHahar chiroyli ekani ko'rinib turibdi, lekin to'g'risi bizda shaharni aylanishga umuman vaqt bo'lgani yo'q.

Narzulla Saydullaev

Melburn