Mirjalol Qosimov: "Yakuniy pallada oqsayapmiz"

"Farruh Sayfievni ilk bor chap qanot himoyasida o'ynatib ko'rdik. Bazi vaziyatlarda uchta himoyachi bo'lib o'ynadik. Menimcha Sayfiev yaxshi harakat qildi. Bugun o'yinimiz yomon chiqqani yo'q, to'p nazorati bizda bo'ldi. Lekin imkoniyatlardan foydalanishda oqsayapmiz. Hujum chizig'i meni xavotirga solmoqda", - deb gap boshladi Qosimov.

- Bugun Farruh Sayfievni chap qanot himoyasida sinashdan maqsad kutilmagan jarohat bo'lib qolsa ularga tayyor turish uchunmi?
- Buni anchadan beri o'ylab yurgan edik. Mana bugun imkoniyat bo'ldi va Farruhni chap qanotda sinab ko'rdim.

- Akbar To'raevning maydonga tushgani uchta o'yinda uchta darvozabonga imkon berish uchun qilindimi?
- Albatta, to'g'ri takidladingiz. O'rtoqlik o'yinlarida barcha posbonlarimizni tekshirib olamiz.

- Markazda o'yinimiz yaxshi chiqmoqda, lekin hujumda bunday deb bo'lmaydi...
- Men ham shuni aytdimda. Yakuniy pallada biz yaxshi harakat qila olmayapmiz. Bundan tashqari ob-havoning ham tasiri bo'lgani turgan gap.

- Bugun Bahrayn o'z o'yinini ko'rsata olmadimi yoki biz bunga yo'l qo'ymadikmi?
- O'rtoqlik o'yini bo'lgani uchun ham biroz sustroq o'ynashdi. Bu ruhiyat bilan bog'liq. Bunday bahslarda hech kim 100 foiz kuchi bilan o'ynamaydi.

- Ikkinchi bo'limda asosiy o'yinchilarga dam berganingiz sababi ularni BAA bilan bahsga asrashmidi?
- Asosiy sababi ob-havoning issiqligi bo'ldi. Bundan tashqari BAA bilan o'yindan oldin qolgan o'yinchilarga ham imkon berishni ko'zlagandim.

- Bugun hakamlarga biz tomondan etirozlar ko'p bo'ldi. Ellikka-ellik vaziyatlarda raqib foydasiga qaror chiqarildi.
- Menimcha terma jamoalar o'rtasidagi o'yinlarda yuqoriroq saviyadagi hakamlar ishlashi kerak. Oddiy vaziyatlarda ham bizga qarshi qarorlar qabul qilindi.

Nodirxo'ja Yuldashev
Dubay