Mirjalol Qosimov: "Sobirxo'jaevga ko'p marotaba Ahmedovni misol keltiraman"

- Bugun Sobirxo'jaev yaxshilardan biri bo'ldi, uning kelajakdagi faoliyatiga qanday baho bergan bo'lardingiz?
- Sardorni besh yoshligidan bilaman. Istedodi kuchli futbolchi. Umid qilamanki undan kelajakda MTJ uchun ham yaxshi o'yinchi chiqadi. Ko'p marotaba Sardorga Odil Ahmedovning faoliyatini o'rnak qilib ko'rsataman.

- Bugun "Bunyodkor" ikki hujumchi bilan harakat qildi. Odatda siz bir nafar hujumchi bilan o'ynardingiz?
- Agar yarim himoyachilar o'yin kuniga hujumchiga nisbatan kuchli bo'lib va foydasi katta bo'ladigan bo'lsa, yarim himoyachilar sonini ko'paytirgan maqul. Vaziyatga qarab taktikamizni o'zgartirib boramiz.

- To'raev, Hasanov va Nesterov bugun "Bunyodkor"ga raqib sifatida maydonga tushdilar...
- Bu hayot. Ular bilan maydon tashqarisida do'stimiz, maydonda esa raqib.

- Karlos Kotoga o'yinni to'liq o'tkazish imkoniyat bermadingiz. Uni mahalliy futbolchilardan bir kalla ustun deb ayta olasizmi?
- Mavsum endi boshlandi. Unga vaqt berishimiz kerak. O'ylaymanki, uning jamoamizga foydasi tegadi.

- 11 mart kunigi OCHL o'yini qaerda bo'ladi?
- O'z maydonida hujum qilayotgan jamoa uchun maydonning holati katta ahamiyat kasb etadi. Maysaning bugungi holatini suratga olib OFKga yubordik. Agar ruxsat berishsa 11 mart kuni "Paxtakor" Markaziy stadionida uy uchrashuvimizni o'tkazamiz.