Mirjalol Qosimov: "Hali barchaga imkon beramiz"

"Natijadan qoniqmadik. Bugun muxlislarga qo'shaloq bayram taqdim etmoqchi edik. Ko'rdinglar birinchi bo'limda o'yinimiz chiqmadi, ikkinchi bo'limda yosh o'yinchilar o'zlarini ko'rsatishdi va biroz hujumkorlik ortdi. Osiyoda barcha jamoalar kuchayishmoqda. Osiyo Kubogi-2015ga qadar hali vaqt bor, musobaqaga qadar zaxiradagi o'yinchilarni sinovdan o'tkazib olishimiz kerak. Mana shunday o'yinlar orqali biz yoshlarni ko'rib olamiz. To'g'ri o'rtoqlik uchrashuvlarida ham natija muhim", - deb gap boshladi Qosimov.

"Bugun uchta futbolchimiz terma jamoadagi so'nggi o'yinlarini o'tkazishdi. Ushbu qaror yigitlarning o'zidan ham chiqdi. SHu bois insoniylik tomonlama ham ular uchun mana shu o'yinda imkoniyat yaratib berdim. Bugun mag'lub bo'ldik, lekin bu o'yinchilarga biroz bo'lsa ham bayram tashkil qilib berdik".

"Ushbu o'yinlarga chaqiruv olishmagan Jeparov, Kapadze, Geynrix va Haydarov hali terma jamoada faoliyatlarini davom ettirishadi. Ularning foydalari bizga ko'p tegadi".

"Temurxo'ja Abduxoliqovning yig'inga taklif olmaganining sababi? Bir vaqtning o'zida barchani chaqira olmaymanku. Hali barchani sinovdan o'tkazamiz. Ikki o'yinda ham hujumchilar gol ura olishmadi, lekin faqat gol bilan o'lchash kerak emas."

"Qanotdan oshiriladigan paslar har doim ham gol bilan tugamaydi. Lekin agar yigitlar buni o'rganib olishsa juda katta foydasi tegadi. Futbolchilarning to'pni noaniq tepishlari, tezkor qaror chiqara olmasliklari bilan bog'liq".

"Ummonga qarshi ikkala o'yinda ham futbolchilarning o'yini yorqin chiqmaganini tan olaman. Bularning ustida ishlashda davom etamiz", - deydi Qosimov.