Mirjalol Qosimov Azamat Isroilov nima uchun Bokuga uchmaganini izohlab berdi

Bu o'yinga 23 nafar futbolchi chaqirilgandi, lekin Mirjalol Qosimov 20 nafar o'yinchi bilan Bokuga jo'nab ketdi. Tarkibdan “Olmaliq” futbolchilari Azamat Isroilov bilan Diyor Turopov, shuningdek “Neftchi” darvozaboni Abdumavlon Abdujalilov tushib qolishdi.

Malumki, Osiyo o'yinlarida ishtirok etadigan O'zbekiston terma jamoasi iyul oyi oxirlarida Toshkentda to'qqiz kunlik yig'in o'tkazgandi. O'shanda oliy liganing to'rtta klubiga qarshi bo'lib o'tgan o'rtoqlik uchrashuvlarida “Olmaliq” himoyachisi Azamat Isroilov yaxshi taassurot qoldirgandi. Biroq u Ozarboyjonga ketmadi. Buning sababini esa terma jamoamiz ustozi Mirjalol Qosimov quyidagicha tushuntirib berdi:

“To'g'ri, oldingi o'yinlarda Azamat Isroilov o'zini ko'rsatgandi, biroq o'sha yig'inimizda Davron Hoshimov ishtirok etmagandi. SHu bois bu safar “Paxtakor” himoyachisini sinab ko'rishga qaror qildim. Osiyo o'yinlarigacha hali vaqt bor, shunday ekan, hali hech kim yakuniy ro'yxatdan tushib qolgani yo'q. Inchonga borish uchun hammada imkoniyat bor”.

X.Xoliqov.